Почнува книжевниот фестивал „Друга приказна“

Книжевен фестивал „Друга приказна“ ќе се одржи утре и задутре во Пионерскиот дом „Карпош“ во Скопје.

Тема на овогодинашниот фестивал се сликовниците. Фестивалот ќе се обиде да понуди свеж пристап кон жанрот на сликовниците, преку мултимедијални и перформативни иновации.

Фестивалот ќе отвори со промоција на новиот број на списанието „Маргина“, проследено со изложба „Седум современи македонски илустратори“. Главниот настан ќе биде „Читање на омилените сликовници“ каде ќе учествуваат повеќе посветени читатели од различни професионални сфери. Вториот ден ќе се одржи промоција на новата едиција „Старо купувам“ во издание на „Темплум“, која спојува класични текстови за деца од важни македонски автори, преоблечени во оригинални илустрации од млади македонски ликовни уметници. Ќе биде одржана и проекција на три анимирани видео-сликовници, како и камишибаи-претстави (јапонски сликовен театар), со цел откривање на нови димензии на сликовниците.

Добитник на главната награда на фестивалот годинава е бугарскиот писател Георги Господинов. Досегашни добитници на наградата се Давид Албахари, Влада Урошевиќ, Оља Савичевиќ Иванчевивиќ, Ненад Величковиќ и Јана Бауер.