Полицаецот од Велес бил прободен во срце

Од Обвинителството информираат дека полицаецот од Велес, кој синоќа бил убиен во неговиот дом, бил прободен во пределот на срцето.

-Основното јавно обвинителство во Велес по добиени информации во текот на ноќта, изврши увид во куќа во Велес каде е извршено кривично дело Убиство. Првичните сознанија на обвинителството упатуваат на констатација дека смртта кај пронајденото починато лице, велешанец на возраст од 40 години, настапила по убод со нож во пределот на срцето.

По наредба на јавен обвинител, подигнати се траги и предмети од самото место на настанот кои ќе бидат доставени на вештачење, а телото на починатото лице – вработен во СВР Велес, предадено е на Институтот за судска медицина, криминалистика и медицинска деонтологија заради вршење на обдукција. Во текот на денот ќе се изврши испитување на лицето за кое постои сомневање дека е сторител на кривичното дело, информираат од Обвинителството.

Од МВР претходно информираа дека приведена е 23-годишната П.И. од Велес, под сомнение дека утринава во 02.20 часот во семејната куќа со остар предмет му нанела убодна рана на А.Р. (40) со кого живеела во вонбрачна заедница, по што тој починал.