Политико: Фицо го шокирала менталната состојба на Трамп на средбата во Мар-а -Лаго

Словачкиот премиер им кажа на лидерите на Европската Унија на самитот минатата недела дека неговата средба со Доналд Трамп го шокирала поради менталната состојба на американскиот претседател, изјавија за Политико пет европски дипломати запознати со разговорот.

Според нив, Фицо го опишал настапот на Трамп за време на нивната средба лице в лице во имотот на Трамп во Мар-а-Лаго во Флорида на 17 јануари како „опасен“.

Роберт Фицо, еден од ретките лидери на ЕУ кој често ги поддржува ставовите на Трамп за слабостите на Европа, изразил загриженост за „психичката состојба“ на американскиот претседател, рекоа двајца дипломати.

Разговорот меѓу Фицо и неговите европски колеги се одржал на 22 јануари во Брисел, на маргините на вонредниот самит на ЕУ свикан на разговори за трансатлантските односи по заканите на Трамп дека ќе го преземе Гренланд.

Лидерите го искористија состанокот за да се обидат да ги смират тензиите откако американскиот претседател ја повлече својата закана за воведување царини за некои европски земји во врска со ова прашање еден ден претходно.

Словачкиот премиер ги даде своите забелешки за време на неформален разговор на мал круг лидери на ЕУ и високи функционери, а не за време на официјални тркалезни маси, рекоа дипломатите. Ниту еден од дипломатите што разговараа со Политико лично не учествувал на таа средба, но некои лидери ги информираа одделно за содржината на разговорот набргу потоа, наведува медиумот.

На сите дипломати им беше дадена анонимност за да можат да зборуваат за доверливи разговори меѓу лидерите. Тие доаѓаат од четири различни влади на земји-членки на ЕУ, додека петтиот извор е висок функционер на ЕУ.

Сите изјавија дека не знаат точно што му рекол Трамп на Фицо и што ја предизвикало неговата реакција.