Поранешниот малезиски премиер Наџиб Разак осуден на 15 години затвор за злоупотреба на службена должност и перење пари
Врховниот суд на Малезија го осуди поранешниот премиер Наџиб Разак на 15 години затвор и висока парична казна од 13,5 милијарди рингити (2,8 милијарди долари) и конфискација на неговиот имот, откако го прогласи за виновен по повеќекратни обвиненија за злоупотреба на службена должност и перење пари во сè поголем корупциски скандал поврзан со одземање милијарди од фондот 1Malaysia Development Berhad (1MDB), објавија западните агенции.
Судијата го осуди Наџиб на 15 години затвор за секое од четирите точки на обвинението за злоупотреба на службена должност и пет години за секое од 21 точки на обвинението за перење пари. Казните ќе течат истовремено, што значи дека Наџиб ќе отслужи уште 15 години затвор. Новата казна ќе стапи на сила откако ќе истече неговата сегашна казна во претходен случај поврзан со фондот 1MDB, рече судијата.
Наџиб (72) е во затвор од август 2022 година, откако беше прогласен за виновен во претходен случај поврзан со фондот 1Malaysia Development Berhad, кој го ко-основаше во 2009 година како премиер.
Судијата на Врховниот суд денес го казни со 11,4 милијарди рингити (2.391.763.320 евра) по обвинение за злоупотреба на службена должност. Тој, исто така, му наложи на Наџиб да врати дополнителни 2,08 милијарди рингити (436.391.904 евра) според законите за перење пари.
Доколку Наџиб не плати, ризикува дополнителна затворска казна.
Адвокатот на Наџиб изјави дека планира да поднесе жалба на пресудата. Облечен во сино одело, Наџиб стана и остана смирен додека беше објавена пресудата, а потоа се врати во својата столица во судницата. Поранешниот премиер негира какво било кривично дело, пренесуваат британските медиуми.
