Пораз на стартот од Европското првенство за младите македонски ракометарки

Женската младинска ракометна репрезентација на Македонија претрпе пораз вечерва во дуелот со европскиот првак Унгарија во првото коло на Европското првенство. Унгарките славеа со 38:21, полувреме 16:11.

Европскиот шампион Унгарија почна сигурно и поведе со 4:0, а кон средина на првиот дел беше 12:5. Во второто полувреме по десетина минути игра Унгарките имаа и двоцифрена предност со 25:15, а во финишот на натпреварот со серија од 8:1 стигнаа и до конечните 38:21.

Најефикасна на дуелот беше Вирај Фазекаш од Унгарија со 9 голови, додека кај Македонија Исидора Котевска и Ива Велкова постигнаа по 4 голови.

На вториот натпревар од групата А Чешка ја победи Полска со 30:24.

Македонија утре (четврток) го игра дуелот од второто коло против селекцијата на Полска.