Пожарот во Вардариште ставен под контрола, дел по дел се пушта електрична енергија
Пожарот во депонијата Вардариште е ставен под целосна контрола.
Дел по дел, ќе биде пуштена електричната енергија во населбите во кои имаше прекин.
Денес попладне изби пожар во депонијата Вардариште. Од безбедносни причини исклучени се неколку далноводи поради што без напојување со електрична енергија останаа делови од населбите (или цели населби) Аеродром, Лисиче, Методија Андонов Ченто, индустриската зона, Кванташки пазар, Арачиново, Стајковци, Трубарево и Бунарџик.
Поради обемот на пожарот и опасноста да се прошири надвор од депонијата како помош на БППЗ Скопје се испратени еден БТР, еден хермелин и еден тим на ДЗС.
Постојат сомневања дека се работи за намерно предизвикано палење на депонијата Вардариште.
По барање на Противпожарната бригада на Град Скопје, а во врска со пожарот во Вардариште, превентивно беше исклучен далекуводот што ги снабдува трафостаниците „Аеродром” и „Исток”.
Оваа мерка е преземена од безбедносни причини, со цел да се овозможи гаснење на пожарот и да се спречат поголеми дефекти на мрежа.
Екипите на Електродистрибуција се веќе на терен и се подготвени да интервенираат, но чекаат официјално одобрение од Противпожарната бригада за да можат безбедно да го нормализираат снабдувањето со електрична енергија.
