Принцот Вилијам откри како им ја соопштиле веста на децата дека Кетрин има рак: „Криењето на работите не функционира“

Принцот Вилијам откри дека тој и принцезата од Велс отворено разговараат со своите деца за тешките моменти што ги поминале изминатите две години, вклучувајќи ги дијагнозите на рак кај Кетрин и кралот Чарлс.

„Одлучивме многу повеќе да разговараме со децата… криењето на работите од нив едноставно не функционира. Секое семејство има свои тешкотии и предизвици. Тоа е многу индивидуално и зависи од моментот како ќе се справите со нив,“ изјави принцот Вилијам во интервју во Бразил.

Вилијам минатата недела за првпат ја посети Латинска Америка по повод петтото издание на наградата Ертшот Прајз, која самиот ја основал и со која претседава. Наградата ги слави луѓето со иновативни идеи за решавање на глобални еколошки проблеми, а победниците во секоја категорија добиваат по еден милион фунти за понатамошен развој на своите проекти.

Во разговорот за бразилските медиуми, принцот раскажа како со Кетрин се обидуваат нивните три деца – принцот Џорџ, принцезата Шарлот и принцот Луис – да ги разберат семејните предизвици.

„Понекогаш имате чувство дека споделувате премногу со децата. Но, криењето не помага. Се обидуваме да им објасниме како се чувствуваат, зошто се случува тоа, да им дадеме различна перспектива. Тоа им помага да ја видат пошироката слика и да бидат посмирени, наместо анксиозни и со мислата ‘што ми криете’. Има многу повеќе прашања кога нема одговори“, рече тој.

„Секогаш е прашање на рамнотежа. Колку да се каже, што да се каже, кога да се каже. Нема прирачник за родителство – едноставно одите според чувството“, изјави Вилијам.

Принцезата од Велс во јануари откри дека нејзиниот рак е во ремисија, додека кралот Чарлс сè уште прима терапија.

Во истото интервју, Вилијам изјави и дека нивните деца сè уште немаат мобилни телефони.

„Тоа е многу тешко. Нашите деца немаат телефони, но кога Џорџ ќе почне во средно училиште, можеби ќе добие телефон со ограничен пристап.

Веќе станува малку напнато, но мислам дека Џорџ разбира зошто. Им објаснуваме дека проблемот не е во телефонот, туку во пристапот до интернет – децата можат да видат премногу работи што не треба“, рече тој.

Принцот откри и дека тој или Кетрин речиси секое утро ги возат децата на училиште, а низ шега додаде дека често се чувствува како семеен таксист.