Приведен азербејџанскиот опозициски лидер Али Каримли поради наводна вмешаност во соборување на владата и перење пари

Азербејџанските власти денеска го приведоа опозицискиот лидер и поранешен државен секретар Али Каримли, со што го зголемија притисокот врз опозицијата во земјата, објави неговиот советник.

Каримли е претседател на опозицискиот Народен фронт на Азербејџан и е приведен откако беше претресен неговиот дом, заедно со домот на партискиот функционер Мамед Ибрахим.

Властите не дадоа официјални информации за апсењата, додека медиумите блиски до нив објавија дека акцијата била дел од истрагата против поранешниот шеф на претседателската администрација, Рамиз Мехдијев, кој е обвинет за обид за насилно преземање на власта, велепредавство и перење пари, и моментално е во домашен притвор.

Во последните неколку месеци, Азербејџан ја интензивира репресијата против активностите на опозициските партии, активисти и независни политичари, наведуваат организациите за човекови права.