Протести и доцнења на основачкиот Конгрес на новата младинска организација на АфД во Гисен

Основачкиот конгрес на новата организација на подмладокот на десничарската популистичка Алтернатива за Германија АфД (AfD) во западногерманскиот град Гисен започна со неколку часа доцнење поради блокади на пристапот до местото на одржување организирани од противниците на оваа екстремно десничарска партија во земјата.

Полицијата во Гисен објави дека насобраните противници на основачкиот конгрес на младите на AфД од раните утрински часови ги блокираа приодите што водат до салата каде што конгресот требаше да започне во 10 часот.

Се очекува во текот на денот да пристигнат неколку десетици илјади противници на конгресот.

Локалната клиника известува дека досега третирала „12 лесно повредени“ демонстранти, без да прецизира за какви повреди станува збор.

Полицијата известува дека неколку полицајци биле повредени кога демонстрантите фрлале камења и шишиња кон нив.

Како што објавуваат медиумите, лидерите на АфД, Алис Вајдел и Тино Чрупала, пристигнале на конгресот со големо доцнење.

Во Гисен денеска треба да се основа новата младинска организација на АфД, наречена „Генерација Германија“.

Претходната организација „Млада алтернатива“ беше распуштена на почетокот на годината откако АфД се дистанцира од неа по честите обвинувања за десничарски екстремизам и неуставни активности.

Некои покраински ограноци на АфД се официјално класифицирани од страна на Федералната канцеларија за заштита на уставниот поредок како организации со екстремно десничарски тенденции.

Според најновите анкети на јавното мислење, АфД е речиси изедначена со водечките христијански демократи со 26 проценти поддршка, а во некои федерални покраини на истокот од земјата, каде што изборите се одржуваат следната година, АфД е најсилната политичка сила со голема предност.