Протести во неколку градови во Србија по судирот во Нови Сад, приведени се неколку студенти

Студенти и граѓани во Нови Сад, Белград, Ниш и Прокупље на 17 февруари излегоа на улиците како реакција на конфликтот што се случи ден претходно за време на антивладиниот протест во Нови Сад, при што, според организаторите, беа повредени најмалку тројца демонстранти.

Жителите на Нови Сад се собраа пред Српски народен театар. Собирот беше организиран по инцидентите од 16 февруари, кога група мажи облечени во црно, за кои студентите тврдат дека се поддржувачи на владејачката Српска напредна партија (СНС), физички нападнале студенти пред театарот, додека полицијата првично не реагирала.

Видеа објавени на социјалните мрежи прикажуваат како демонстранти, меѓу кои и новинари, се удирани, туркани и соборувани на земја.

Дел од учесниците на протестот во Нов Белград, кои се противат на изградбата на јавен аквариум во паркот Ушќе, вечерва влегоа во оградениот простор наменет за истражни работи за тоа градилиште, а студентите во блокадата потоа објавија дека неколку нивни колеги се приведени.

По собирот, граѓаните одржаа протестна прошетка низ центарот на градот. Во 19:26 часот беше соопштено дека протестот е завршен, а присутните беа повикани повторно да се соберат во среда, на 18 февруари во 13 часот, на Универзитетскиот кампус во Нови Сад, за да дадат поддршка на протестот на независните синдикати на факултетите.

За време на настаните на 16 февруари, во центарот на градот, одвоени со полициски кордони, паралелно се одржаа два собири – антивладин протест предводен од студенти во блокада и собир на поддржувачи на власта пред Српскиот народен театар, организиран по повод свечената академија за 200-годишнината од Матица српска.

Во присуство на засилени полициски сили, неколку стотици поддржувачи на владејачката партија се собраа пред театарот, извикувајќи пораки за поддршка на претседателот на Србија. Според сведоштва на очевидци, во еден момент дел од нив се упатиле кон студентите и новинарите, по што дошло до инцидент.

Овие настани се случуваат во период кога антивладините протести, кои започнаа по уривањето на настрешницата на железничката станица во Нови Сад во ноември 2024 година, при што загинаа 16 лица, траат повеќе од 15 месеци.