Прв Фестивал за миленици „Пет фест Скопје“

На летната сцена „Лепеза“ во стариот дел на Градскиот парк Скопје, денеска ќе се одржи првото издание на фестивалот за миленици „Пет фест Скопје“, со 12-часовна програма исполнета со забавни и едукативни содржини за деца и возрасни, како и за нивните миленици.

Целта на настанот е да се подигне јавната свест за чување миленик, љубовта кон животните и одговорното сопствеништво.

Организаторот на фестивалот, Илија Петковски вели дека милениците. имаат се поважна улога во градењето на стабилноста и хармонијата во домот, бидејќи тие им овозможуваат на децата уште од најрана возраст да научат хириеархија, другарство, споделување, игра и секако подобрување на имунитетот.

Фестивал за миленици- Скопје Пет Фест 1

– Настанот има за цел пред се да ги доближи милениците во нивната разноличност како крзнени, така и водни, крилести или „пајачести”, вели Петковски и додава дека така децата ќе ги запознаат, можеби засакаат, но пред се ќе дознаат за одговорностите кои следат при чувањето на миленик.

Од исклучителна важност е, вели Петковски, да се направи вистински избор пред да се внесе миленик во домот, бидејќи секогаш е подобро да нема миленик во домот, отколку тој да биде несоодветно третиран.

– Интересен е фактот што во некои домови во Македонија се чуваат неверојатно убави расни примероци, кои уживаат во статусот миленик и не се натпреваруваат на изложби, но сепак трендот е во корист на мешаните кучиња, како што е мојот пример. Ние дома имаме две, вели Петковски.

Во склоп на целодневната програма, децата ќе имаат можност да се информираат преку непосреден контакт со лица чии професии се фризер за миленици, одгледувач, дресер, зоонегувател, како и со претставници од организацијата Македонско еколошко друштво. Исто така ќе бидат запознаени со невообичаените проекти на Средното ветеринарно училиште. Додека пак, децата од најмладата возраст ќе имаат можност да се информираат преку едукативното и забавно ликовно катче.

Фестивал за миленици- Скопје Пет Фест 2

„Пет фест Скопје” оди во насока да не биде секогаш главна тема вдомувањето на милениците, туку реалното прикажување на сите аспекти од „пет сферата”, како што се одговорностите при чувањето, нивниот избор, како и поедноставувањето при чувањето на миленик.

Фестивал за миленици- Скопје Пет Фест 3

– Монополизацијата на вдомувањето како респектабилна тема сакавме да ја прикажеме преку поинаква призма, со тоа што на граѓаните ќе им ги доближиме сите аспекти од светот на милениците, заклучи организаторот на првото издание на фестивалот за миленици „Пет фест Скопје”.

Фестивалот завршува со проекција на македонскиот филм „Стела“ на Стојан Вујичиќ и диџеј сетот на Соња Исмаил.