Путин отворен за средба со Трамп, го фали како храбар и посветен на мирот

Рускиот претседател Владимир Путин денеска изјави дека неговата средба со американскиот претседател Доналд Трамп е сосема можна и дека руската страна ќе се подготви за неа.

-Оваа средба е сосема можна и ние со задоволство ќе се подготвиме за неа, изјави Путин за новинарите по завршувањето на посетата на Белорусија.

Тој го пофали Трамп како храбар човек и додаде дека токму благодарение на него се подобруваат односите меѓу двете сили, иако има уште нерешени прашања во дипломатските релации.

– Имам големо почитување кон сегашниот претседател на Соединетите Американски Држави, тој помина низ многу тежок, сложен и небезбеден пат за да се врати на власт и во Белата куќа, рече Путин. – Општо земено, благодарение на претседателот Трамп, односите меѓу Русија и Соединетите Американски Држави почнуваат да се израмнуваат во некои аспекти. Не е сè решено во сферата на дипломатските односи, но првите чекори се преземени. Одиме напред, нагласи Путин.

Тој соопшти дека се воспоставени нови работни канали меѓу надворешнополитичките и безбедносните служби на двете држави, што е клучно за соработката во борбата против тероризмот. Воедно, му се заблагодари на Трамп за ангажманот околу Блискиот Исток и кризата во Украина.

– Она што го прави во земјата, она што го прави на Блискиот Исток и неговите напори за решавање на украинската криза – сите ние, секако, многу го цениме тоа, рече Путин.

Тој додаде дека сака јавно да нагласи дека Трамп „искрено се стреми“ да го реши прашањето за конфликтот на Русија со Украина.

Зборувајќи за новиот пакет санкции од страна на Европската Унија против Русија, Путин рече дека тие веројатно нема да имаат значително влијание врз Русија и дека Западот нема да може да ги запре испораките на руска нафта, бидејќи нејзината потрошувачка во светот расте.

„Дали тоа ќе ни наштети, ќе видиме врз основа на реалноста што ќе се развие, но не мислам дека ќе има значително влијание врз нас. Количината на нафта и нафтени производи што се трошат во светот расте истовремено со растот на самата економија. Нема бегање од тоа“, оцени Путин.

Тој оцени дека земјите што воведуваат санкции против Русија ги влошуваат работите за себе со секој нов пакет ограничувања. Путин рече дека „во водечките економии, во центрите на индустриски развој во Европа, и во Германија и во Франција, сè е на работ на рецесија“.

Рускиот лидер вели дека реториката за нанесување „стратешки пораз“ на Русија продолжува, додека Западот зборува за имагинарна закана од напад од Руската Федерација.

– Што се однесува до вооружените сили, тие постојано ни кажуваат дека имаме некои проблеми, дека наскоро ќе го постигнат стратешкиот пораз на Русија, оваа реторика не престана. И во исто време емитуваат дека ќе ги нападнеме земјите од НАТО. Каде е логиката? Ако сè се распаѓа, зошто ќе го нападнеме НАТО? Па, тие зборуваат глупости и сигурно самите не веруваат во тоа, и се обидуваат да го убедат своето население во ова за да исцедат повеќе пари од луѓето за да се согласат да го носат тешкиот товар на овие трошоци во социјалната сфера“, посочи Путин.

Тој додаде дека милитаристичкото расположение на Западот се темели на тезата за „агресивноста“ на Русија, што според него е теза во која сè е превртено наопаку. „Таканаречената западна заедница, колективниот Запад, ако воопшто може да се нарече колективен денес, сè уште превртува сè наопаку. Зошто? Затоа што и зголемувањето на воените трошоци и милитаристичката лудост за која штотуку зборувавме се темелат на една теза, на „агресивноста“ на Русија, а ова е токму спротивното“, рече Путин.

Тој изјави дека Русија има намера да ги намали трошоците за одбрана во иднина.

Планираме да ги намалиме трошоците за одбрана. Планираме за следната година, и за годината потоа, и за следните три години, сè уште нема конечен договор помеѓу Министерството за одбрана, Министерството за финансии, Министерството за економски развој, но генерално сите размислуваат во таа насока. А Европа, напротив, размислува како да ги зголеми своите трошоци, рече Путин.