„Ритамот на чаршијата“ од 17-ти до 19-ти јуни

Во Старата скопска чаршија од 17-ти до 19-ти јуни по втор пат ќе се одржи манифестација „Ритамот на чаршијата“, во организација на ЈУ Детски културен центар – Карпош со поддршка на Град Скопје.

Старата скопска чаршија е најголемата чаршија на Балканот која претставува заштитен национален симбол и една од најголемите атракции на Скопје. Целта на „Ритамот на чаршијата“ е да ја заживее чаршијата од еден поинаквов агол, во духот на ритамот.

– Чаршијата плени со мали дуќанчиња, занаетчиски објекти, верски објекти, чајџилници, ресторани, музеи и амами кои се само дел од обликуваноста на просторот и времето од убавината на Старата чаршија во Скопје и затоа таа е една која што е меѓу најпосетуваните локации од страна на туристите и локалните жители. Самата прошетка низ нејзините калдрмени улици е магија преку која овде сè уште може да се почувствува минатото – духот на градот. Чаршијата сѐ уште живее во духот на традицијата, во себе криејќи приказни за едно минато кое и денес оставило белег, наведуваат од Детскиот културен центар – Карпош.

Оваа година ќе се популаризираат објектите Сули Ан и Музеј на македонската борба. Публиката на 17.06 од 19.00 часот во Сули Ан ќе го почуствува ритамот на чаршијата преку чалгиската музика на Тимчо Чичаковски-трио, а на 19.06 од 19:00 часот со свој концерт на пијано ќе се претстави Јован Станковиќ, млад талентиран ученик во ДМБУЦ Илија Николовски Луј во класата на проф. Весна Ангелова Христов. Гости на концертот се Матеј Петковски и Никола Соколовски на кларинет.

Влезот на настаните од „Ритамот на чаршијата“ е слободен.