Русија ја нападна Украина  

Руските војски остваруваат напади на мирните украински градови од различни правци, вклучително и од страната на привремено окупираните Донбас и Крим, како и североисточниот регион, објави Украина откако рускиот претседател Владимир Путин во обраќање ранo утрово во 4 часот, одобри, како што ја нарече специјална воена операција на исток.

Тој најави воена операција во Украина, тврдејќи дека има за цел да ги заштити цивилите.

Во телевизиско обраќање, Путин рече дека акцијата доаѓа како одговор на заканите кои доаѓаат од Украина. Тој додаде дека Русија нема цел да ја окупира Украина. Путин тврди дека одговорноста за крвопролевањето е на украинскиот „режим“.

Путин ги предупреди другите земји дека секој обид за мешање во руската акција ќе доведе до „последици кои досега не се видени“.

Tој ги обвини САД и нивните сојузници дека го игнорираат барањето на Русија да ја спречи Украина да влезе во НАТО и да и понуди на Москва безбедносни гаранции.

Тој рече дека руската воена операција има за цел да обезбеди „демилитаризација“ на Украина. Путин истакна дека сите украински војници кои ќе го положат оружјето ќе можат безбедно да ја напуштат зоната на борба.

Путин додава дека судирите меѓу украинските и руските сили се „неизбежни“ и оти тоа е „само прашање на време“, пренесува Би-Би-Си.

Само неколку минути претходно, потсекретарот на ОН предупреди дека воената ескалација ќе доведе до „неприфатливо висока цена, човечко страдање и уништување“.

Во тек е итна седница на Советот за безбедност.

Дописникот на Би-Би-Си во Киев штотуку објави дека слушнал пет до шест „далечни експлозии“ во Киев, и вели дека има извештаи за експлозии на други места во земјата.

Локалните медиуми јавуваат дека пукотници се слушнале во близина на главниот аеродром Бориспил во Киев.

Експлозии можат да се слушнат за време на јавувањето во живо на репортерот на Си-Ен-Ен од Киев.

Според Ројтерс, експлозија се слушнала и во Русија, во близина на украинската граница.