Русија нападна рудник за јаглен во украинскиот регион Дњепропетровск

Русија вчера изврши тежок напад врз рудник за јаглен во украинскиот регион Дњепропетровск, соопштија украинските власти.

– Непосредно пред почетокот на грејната сезона, непријателот уште еднаш зададе удар врз украинската енергетика, соопшти раководството на рудникот на Телеграм.

Во моментот на нападот, 192 рудари биле под земја во рудникот. Сите наводно биле безбедно евакуирани, пренесе ДПА.

Раководството соопшти дека најновиот инцидент е четврти голем напад врз објектите за јаглен на компанијата во изминатите два месеци.

Само претходниот ден, имало прекини на струја во регионот Дњепропетровск по руските напади врз објектите за снабдување со енергија.

Во друг руски напад, синоќа била погодена енергетска централа во селото Корјукив во регионот Чернихив.

– Штетата е многу голема, соопшти регионалниот снабдувач со електрична енергија на Телеграм.

Околу 55.000 луѓе првично останале без снабдување со струја.

Руската војска неодамна ги засили своите напади врз објектите за снабдување со енергија во Украина. Целта на нападите е да се прекине или попречи снабдувањето со електрична енергија и вода за цивилното население со почетокот на зимата.

Руски дронови биле забележани и доцна синоќа. Според украинското воздухопловство, беспилотните летала прелетале над регионите Суми, Чернихив, Полтава и Харков. Целта на нападите не е соопштена. Во некои делови од земјата било издадено воздушно предупредување.

Украина се брани од руската инвазија од февруари 2022 година.