Руски воени бродови се упатија кон Кина, следната недела ќе учествуваат на заеднички вежби

Кинеската и руската морнарица следната недела ќе одржат заеднички вежби во водите и воздушниот простор во близина на кинескиот град Кингдао. Веста денеска ја објавија кинеското Министерство за одбрана и руските државни медиуми, пишуваат британските медиуми.

Во соопштението за медиумите се наведува дека вежбите се одржуваат секоја година „со цел заедничко решавање на безбедносните предизвици и одржување на регионалниот мир и стабилност“.

Руските медиуми објавија дека крстосувач, корвета, дизел-електрична подморница и спасувачки брод од Руската пацифичка флота пристигнале во Кингдао за да учествуваат во вежби што ќе траат од 6 до 13 јули.

„По вежбите, дел од силите од двете страни ќе продолжат кон соодветните области на Тихиот Океан за да спроведат заеднички поморски патроли“, се наведува во соопштението.