САД ја продолжија вонредната состојба во Западен Балкан за уште една година, почнувајќи од утре

САД ја продолжија националната вонредна состојба во однос на Западен Балкан, што беше прогласена во 2001 година, за уште една година, почнувајќи од 26 јуни. Извршната наредба за продолжување на вонредната состојба ја потпиша американскиот претседател Доналд Трамп.

Во документот објавен во американскиот Федерален регистар се наведува дека националната безбедност и надворешната политика на САД се загрозени „од дејствијата на лицата кои учествуваат во, помагаат, спонзорираат и поддржуваат екстремистичко насилство во Северна Македонија и на други места во Западен Балкан, како и од попречувањето на спроведувањето на Дејтонскиот договор или кршењето на Резолуцијата 1244 на Советот за безбедност на ОН“.

Во текстот на Извршната наредба, исто така, се наведува дека „дестабилизирачките дејствија, корупцијата и обидите за поткопување на суверенитетот на земјите во регионот претставуваат исклучителна закана за националната безбедност и надворешната политика на САД“.

Извршната наредба со која првпат беше прогласена вонредна состојба за САД во однос на Западниот Балкан беше објавена на 26 јуни 2001 година, за време на мандатот на американскиот претседател Џорџ В. Буш.

Претходниот американски претседател Џозеф Бајден ја потпиша Извршната наредба 14140 на 8 јануари, пред тогаш новоизбраниот претседател Трамп да ја преземе функцијата, со која беше продолжена вонредната состојба во врска со Западниот Балкан до 26 јуни оваа година.