САД им ги укинаа визите на палестински функционери пред ГС на ОН, Израел задоволен

Американскиот Стејт департмент денеска соопшти дека „им забранува и им одзема визи на членовите на Палестинската ослободителна организација (ПЛО) и на Палестинската управа (ПА)“, помалку од две недели пред почетокот на Генералното собрание на ОН во Њујорк.

Ова доаѓа откако голем број земји, вклучувајќи ги Франција, Австралија и Канада, ги најавија своите намери да ја признаат палестинската државност на овој значаен собир, пренесува ДПА. Потегот е жестоко оспоруван од Израел и неговиот најважен поддржувач, САД.

– Пред ПЛО и ПА да можат да бидат сметани за партнери за мир, тие мора постојано да го отфрлаат тероризмот – вклучувајќи го и масакрот од 7 октомври – и да стават крај на поттикнувањето тероризам во образованието, како што се бара со американскиот закон и како што вети ПЛО, се вели во изјавата на Стејт департментот со која се оправдуваат визните ограничувања.

Првично не беше јасно дали ова значи дека американските власти исто така би можеле да му го одбијат влезот на палестинскиот претседател Махмуд Абас, за да присуствува на собирот, кој треба да се одржи во Њујорк од 9 септември.

Стејт департментот првично не одговори на барањето за коментар.

Според изјавата, палестинската мисија при ОН – која има само статус на набљудувач и не е полноправна членка на телото – е ослободена од визните ограничувања.

САД веќе воведоа визни ограничувања против ПЛО и ПА кон крајот на јули, но досега овластените влезни дозволи не беа одземени.

ПА, предводена од 89-годишниот Абас, управува со делови од окупираниот Западен Брег, додека ПЛО служи како официјален претставник на Палестинците на меѓународно ниво.

Израелскиот министер за надворешни работи, Гидеон Саар, денеска ја поздрави одлуката на САД да им ги укинат визите на палестинските функционери пред седницата на Генералното собрание на Обединетите нации следниот месец.

Тој му се заблагодари на американскиот државен секретар, Марко Рубио, поради тоа што со овој потег ја повика на одговорност Палестинската ослободителна организација (ПЛО) и Палестинската управа (ПА) „заради наградувањето на тероризмот, како и поради поттикнувањето на војната против Израел“, пренесе Тајмс оф Израел.

Шефот на израелската дипломатија, исто така, рече дека администрацијата на претседателот Доналд Трамп „со овој смел чекор уште еднаш застанала на страната на Израел“.