САД може да се повлечат од решавањето на војната во Украина, вели синот на Трамп

Американскиот претседател, Доналд Трамп, би можел да се повлече од решавањето на војната во Украина, изјави неговиот најстар син Доналд Трамп помладиот на конференција на Блискиот Исток.

Во долгиот говор против продолжувањето на борбите во Украина, Доналд Трамп помладиот, исто така, рече дека „корумпираните богати луѓе од Украина избегале од земјата, оставајќи го она што го сметале за селска класа да се бори во војната“.

Трамп помладиот нема официјална улога во администрацијата на Доналд Трамп, но е клучна фигура во движењето MAGA.

Неговиот настап ја одразува антипатијата на некои членови на тимот на Трамп кон украинската влада и доаѓа во време кога преговарачкиот тим на Трамп врши притисок врз Киев да отстапи територија.

Трамп помладиот изјави дека украинскиот претседател Володимир Зеленски ја продолжува војната, бидејќи знае дека никогаш нема да победи на изборите ако војната заврши.

Тој, исто така, ја критикуваше шефицата за надворешна политика на ЕУ, Каја Калас, велејќи дека европските санкции не функционираат бидејќи само ја зголемиле цената на нафтата, од која Русија може да ја финансира војната.

Трамп помладиот без докази тврдеше дека за време на еден ден во Монако ова лето видел дека 50 проценти од автомобилите како Бугати и Ферари имале украински регистарски таблички.

Кога го прашале дали е можно неговиот татко, кој водеше кампања дека може да донесе мир во Украина, едноставно да се откаже, Доналд Трамп помладиот рекол можеби, објаснувајќи дека неговиот татко е еден од најнепредвидливите луѓе во политиката.

Извор: fokus.mk