САД воведоа санкции за тројца Бугари по законот „Магнитски“

Канцеларијата за контрола на странски активи на Министерството за финансии на САД (OFAC) воведе санкции за тројца бугарски државјани заради нивна голема улога во корупција во Бугарија, како и за нивните мрежи опфатени со 64 организации.

Санкциите се против Васил Крумов Божков, Делјан Славчев Пеевски и Илко Димитров Желјазков.

Во соопштението од САД, Божков е посочен како „познат бугарски бизнисмен и олигарх“,  Славчев Пеевски – „поранешен пратеник“ и Илко Димитров – поранешен заменик директор на Државната агенција за технички операции (ДАТО), назначен за заменик претседател на Националното биро за контрола на специјални разузнавачки средства.

Санкциите се однесуваат и на компании во сопственост или контролирани од тие лица.

Тие лица и компании се санкционирани според Уредбата 13818, со која се надополнува и се применува глобалниот закон Магнитски за отчетност за кршење на човековите права и се насочени кон сторителите на сериозни повреди на човековите права и корупција ширум светот.

Санкциите објавени денеска ги откриваат злоупотребите на Божков, Пеевски и Желјазков врз јавните институции за лична корист и го прекинуваат пристапот на тие лица и нивните компании до американскиот финансиски систем. За понатамошна заштита на меѓународниот финансиски систем од злоупотреба од корумпирани лица, Министерството за финансии на САД ги охрабрува сите влади да спроведат соодветни и ефективни мерки против перење пари за да се решат ризиците што ги носи корупцијата.

Back to top button
Close