СДСМ: НВО имаат сопственици само во диктаторските глави на ВМРО-ДПМНЕ

Јасна Мандиќ не е сопственик на Ресурсен центар, ниту, пак, Ребека, која ја води организацијата, а чиј сопруг држеше говор на протестите на 27 април 2017 година, велат од владејачката партија, по прозивките околу распределбата на средства на граѓански организации

-Само во диктаторските глави на ВМРО-ДПМНЕ невладините организации имаат сопственици , реагираат од СДСМ откако опозицијата обвини дека Владата ѝ дала пари на невладина организација во сопственост на Јасна Мандиќ, која беше дел од Меѓународниот сојуз на Бојан Јовановски – Боки 13.

Според ВМРО-ДПМНЕ, владата ѝ доделила пари и на организацијата „Ресурсен центар“, за Мандиќ да влијае во случајот „Рекет 2“, во кој и самата е обвинета.

„Три работи се гледаат во административната селекција:
Дали организацијата е регистрирана во регистарот на невладини здруженија, дали постои повеќе од 2 години и тековната состојба не е постара од 6 месеци. Толку. Притоа, никој не смее и не е дискриминиран. Очигледно во ВМРО-ДПМНЕ ништо не е сменето. Тие би сакале да ги поседуваат сите невладини организации, да ги контролираат и манипулираат како што правеа цела деценија или пак  да ги затворат – по стапките на бегалецот Никола Груевски“, реагираа од СДСМ

Јасна Мандиќ, велат од СДСМ не е сопственик на Ресурсен центар, ниту пак Ребека, која ја води организацијата, а чиј сопруг, како што се посочува, држеше говор на протестите пред Собранието, на 27 април 2017 година.

„Дали тоа значи според ВМРО-ДПМНЕ дека Владата дала пари на оние што го нападнаа Собранието? ВМРО-ДПМНЕ да престанат да врши етикетирање на невладиниот сектор и конечно нека се помири со фактот дека парите од Буџетот не одат во ‘белата палата’, туку се користат исклучиво за интересите на граѓаните“,се наведува во реакцијата на СДСМ.