СДСМ: Трета затворска казна за Груевски, зошто Мицкоски молчи?
Пресудите за „Плацови на Водно“ се нова потврда, ВМРО-ДПМНЕ е криминална партија, реагираат повторно од СДСМ прозивајќи го актуелниот лидер Христијан Мицкоски зошто молчи.
„Перење пари, противправно богатење, криење имот па дури и злоупотреба на пари од членови на ВМРО-ДПМНЕ се кривичните дела што шефот Мицкоски ги сторил во овој судски предмет. Овие кривични дела за коишто сега веќе има судска пресуда се направени и во 2015 година, период кога Христијан Мицкоски му бил советник на Никола Груевски. По случаите ’Тенк‘ и ’Насилство во Центар‘ ова е трета пресуда со затворска казна за Груевски. Но зошто молчи Мицкоски? – велат од СДСМ од каде вчера побараа и оставка од Мицкоски.
Во случајот „Плацови на Водно“, Груевски беше првообвинет за перење пари и противправно стекнување и прикривање имот, а со првостепената пресуда изречена вчера од Основниот кривичен суд во Скопје тој доби седум години затвор.
Во случајот беа изречени уште две затворски казни: од 1 година и 3 месеци за Сашо Мијалков и 1 година за Јордан (Орце) Камчев. Кумот на Груевски од првиот брак, Ристо Новачевски, како и Ненад Јосифовиќ, пак, добија условни казни затвор од 2 години кои нема да се извршат ако во рок од пет години од правосилноста на пресудата не сторат ново кривично дело. Во предметот обвинета беше и Ратка Куновска-Камчева која доби ослободителна пресуда поради застареност на обвинението против неа.
Исто така, судот изрече и конфискација на плацовите на Водно, земјиште во Крушево, два стана на Бихаќка и три стана во „Панорама резиденс“ во Скопје.