СДСМ: Трипуновски е смешен кога се фали со цените на грозјето, високите цени се резултат на законите кои ги донесе СДСМ

Денес министерот за земјоделство се пофали со рекордни цени на грозјето за лозарите. Исто како што секогаш прави ВМРО-ДПМНЕ, заборави да каже дека таа цена е директен резултат на законот што го донесе Владата на СДСМ.

Реалноста е дека новиот Закон за вино, донесен од Владата предводена од СДСМ и изгласан во Собранието на 2 април 2024 година, ги заштити лозарите и овозможи фер и достоинствени цени за најзастапените сорти грозје, Вранец и Смедеревка.

Законот што го подготви СДСМ ги усогласи правилата и со европските регулативи и ги вгради барањата на лозарите, кои со години беа уценувани од винариите со ниски цени објавувани во последен момент пред берба.
Новината што ја донесе СДСМ во Законот за вино е следната:

– Производствената цена се утврдува врз основа на реалните трошоци за производство, пресметани од научна институција.
– На таа цена се додава 25% заработка за лозарите.
– Во месец јули се објавуваат откупните цени за Вранец и Смедеревка, врз основа на направените трошоци и додадената заработка.

Ова им овозможи на лозарите предвреме да знаат на што да сметаат и ги ослободи од уцените и неизвесноста што ВМРО-ДПМНЕ ги практикуваше додека беше на власт.

Денес, кога Трипуновски се слика со лозарите и се фали со цените, се прашуваме како нема срам и не признава дека тие се резултат на јасно утврдена методологија со закон а неговиот придонес за цените е еднаков на нула.

Чесен човек би имал доблест да признае дека тоа не е негов успех, туку резултат на нашата работа и визија за заштита на македонското лозарство.

Лозарите знаат кому му должат благодарност за фер цените кои ги добиваат.

СДСМ