СДСМ тврди дека Мицкоски го крие партнерството со контроверзниот конзул Адамовиќ
Политичката бура околу именувањето на Душан Адамовиќ за почесен конзул на Македонија во Србија не стивнува. Опозицискиот СДСМ денеска излезе со серија тешки обвинувања, директно вперувајќи го прстот кон премиерот Христијан Мицкоски. Според социјалдемократите, одговорот на премиерот во Собранието дека амбасадорот стои зад предлогот за Адамовиќ е чиста манипулација за да се сокрие нивната длабока приватна и бизнис поврзаност.
СДСМ потсетува на законската регулатива почесен конзул не се именува по желба на амбасадор, туку со одлука на Владата на официјална седница.
„Мицкоски излажа. Зад назначувањето на Адамовиќ стои тој лично. Заедничката фотографија од Охрид на која се Мицкоски, Адамовиќ и претседателот на СНС, Милош Вучевиќ, е крунски доказ дека нивните односи се многу поцврсти од дипломатски протокол“, се вели во соопштението.
Опозицијата оди чекор понатаму, тврдејќи дека новиот конзул е човек со сомнително минато. Адамовиќ се поврзува со високи структури во српската владејачка партија СНС, кои СДСМ ги инкриминира во големиот нарко-скандал со заплена на 5 тони дрога по информации од ДЕА.
Дали Мицкоски и Адамовиќ имаат заеднички бизнис релации во енергетскиот сектор (трговија со струја)?
Искористена ли е „сестринската“ линија меѓу ВМРО-ДПМНЕ и СНС за поставување на бизнис партнери на државни функции?
Додека премиерот тврди дека сè е според процедурите, граѓаните веќе се сомневаат во тежината на неговите зборови. СДСМ јавно прашува што точно крие Мицкоски? Зошто за почесен конзул е избран токму човек кој се смета за негов пријател и деловен соработник, наместо некој со беспрекорен дипломатски углед?
Од СДСМ најавуваат дека нема да застанат тука и дека ќе продолжат да ја разоткриваат „мрежата“ на интереси која, според нив, ги диктира кадровските решенија во новата власт. Јавноста во Македонија, но и во Србија, сега со нетрпение очекува одговор на прашањето: Колку денари тежат „бизнис релациите“ кои го крунисаа Адамовиќ со конзулска титула?
