Сенатот го изгласа буџетскиот „мегазакон“ на Трамп, со одлучувачки глас на потпретседателот Џеј Ди Ванс

Американскиот Сенат денеска го усвои таканаречениот „голем убав закон“ (big beautiful bill) на претседателот Доналд Трамп, кој претставува масовен буџетски пакет што ги зацврстува неговите клучни политички приоритети.

Предлог-законот беше изгласан со 51 глас „за“ и 50 „против“, при што одлучувачки беше гласот на потпретседателот Џеј Ди Ванс, кој според Уставот има право да гласа во случаи на еднаков број гласови.

Законот, обемен околу 940 страници, предвидува низа даночни олеснувања, намалување на јавни трошоци, како и зголемени средства за национална одбрана и депортации – мерки кои беа клучни точки на предизборната кампања на Трамп.

Со новото законодавство, американскиот јавен долг ќе се зголеми за дополнителни 3,3 трилиони долари, но Белата куќа инсистира на итно завршување на процедурата за да може претседателот Трамп да го потпише законот до 4 јули – Денот на независноста.

Следниот чекор е гласање во Претставничкиот дом, каде што Републиканската партија има тесно мнозинство. Се очекува расправата таму да започне во следните денови