Шведска го отпушти селекторот

Јон Дал Томасон е сменет од селекторската позиција на фудбалската репрезентација на Шведска. Ова денеска го соопшти Фудбалската федерација на Шведска.

„Управниот одбор на ФФШ донесе одлука да го прекине мандатот на Томасон како селектор на фудбалската репрезентација. Одлуката е донесена по слабите резултати во квалификациите за Светското првенство 2026“ е објавено на официјалниот сајт на федерацијата.

Шведска е последна во групата Б со само еден бод, а синоќа на домашен терен претрпе пораз од Косово со 1:0 и на четирите дуели во групата имаат три порази.

Томасон репрезентацијата на Шведска ја предводеше од февруари 2024 година.