Сиљановска-Давкова: Блокадата на евроинтеграциите добива карактер на сериозен безбедносен ризик за Западен Балкан и ЕУ
Блокадата на евроинтеграциите, вклучувајќи ја нашата, добива димензија и карактер на сериозен безбедносен ризик за регионот на Западен Балкан, но и за ЕУ, оцени денеска претседателката и врховен командант на вооружените сили Гордана Сиљановска-Давкова.
Во обраќањето на Централната свеченост по повод Денот на Армијата, 18 Август, што се одржа во штипската касарна „Јане Сандански“, Сиљановска-Давкова порача дека природата на војната рапидно се менува, а галопирачката трка во вооружувањето диктира поголеми инвестиции во одбраната.
Според неа, важноста на само одржливоста никогаш не била поголема.
-Во ова невреме треба час поскоро да почнеме, како што и почнавме, стратешки да ги планираме средствата и нивната употреба. Надлежните институции треба да размислуваат за долгорочни проекти кои ќе гарантираат само одржливост и развој на одбраната не само во мирни услови, туку и во амбиент на воена закана и потенцијален конфликт, порача претседателката.
Како што напомена, преку три децении Армијата ја пишува својата приказна како вистински чувар на татковината.
-По прогласувањето на независноста во 1991 година, македонската Армија се стави на располагање на државата и граѓаните како гарант на мирот и одбраната, преку континуирана сестрана реформа, помош во справување со кризните и вонредните состојби, поддршка на цивилните институции во справување со елементарните непогоди како пожарите и поплавите. Тоа се уште го прави професионално, одговорно и пожртвувано, а доказ за ова е континуираното уживање највисока доверба кај народот, рече Сиљановска-Давкова во обраќањето.
На свеченоста присуствуваа премиерот Христијан Мицкоски, претседателот на Собранието Африм Гаши, пратеници, министри, поранешни министри за одбрана и началници на ГШ, претставници од Сојузот на борците и од дипломатскиот кор. Построени беа и ново промовираните 26 потпоручници и 149 подофицери кои неодамна ги завршија школувањето и обуката, а претседателката Сиљановска-Давкова го одликува Центарот за обука на питомци и офицери со Орден за воени заслуги.
