Сирискиот претседател пристигна во Белата куќа – Трамп го нарече привлечен, млад борец
Сирискиот претседател Ахмед ал-Шаара денес ќе се сретне со Доналд Трамп во Белата куќа, што е историска прва официјална посета на сириски лидер откако земјата стекна независност во 1946 година. Се очекува тој да побара целосно укинување на преостанатите санкции наметнати врз неговата земја, разорена од војна, објавува The Guardian.
Ахмед ал-Шаара, чии исламистички бунтовнички сили го соборија долгогодишниот владетел Башар ал-Асад кон крајот на минатата година, се обидува да го убеди американскиот претседател да ги укине економските ограничувања наметнати за време на 13-годишната граѓанска војна, тврдејќи дека тие повеќе не се оправдани.
Неговиот советник за медиуми, Ахмад Зејдан, изјави за саудиската телевизија Ал Арабија дека најважното прашање на дневен ред е укинувањето на Законот Цезар од 2019 година, со кој се воведоа сеопфатни санкции за кршењата на човековите права од страна на режимот на Асад.
Трамп го нарече борец
Трамп се сретна со сирискиот лидер за прв пат минатиот мај во Ријад. Пред интервјуто, тој го пофали пред новинарите како „млад, привлечен човек. Цврст човек. Силно минато. Многу силно минато. Борец“. По таа средба, Трамп нареди укинување на повеќето санкции, што претставуваше голема промена во американската политика.
Сепак, Цезаровиот закон останува на сила и ќе биде потребно гласање во Конгресот за трајно укинување. Тоа е неверојатен пресврт за ал-Шара, поранешниот лидер на бунтовничката група што ја предводеше операцијата за соборување на Асад, а за чија глава американската влада еднаш понуди награда од 10 милиони долари.
Минатиот четврток, Вашингтон го предводеше гласањето во Советот за безбедност на ОН за укинување на санкциите на ОН против него лично. Во септември, ал-Шара, поранешен џихадист некогаш поврзан со Ал Каеда, стана првиот сириски претседател по децении што се обрати на Генералното собрание на ОН во Њујорк.
САД очекуваат помош од Сирија против Исламска држава
„Имаме голема мисија да ја изградиме економијата“, рече тогаш ал-Шаара. „Сирија има разновидна работна сила. Тие сакаат да работат, тоа е во нивните гени. Затоа не грижете се, само укинете ги санкциите и ќе ги видите резултатите“, рече тој. Според проценките на Светската банка од октомври, трошоците за обнова на Сирија се најмалку 216 милијарди долари.
Израел се спротивставува на укинувањето на санкциите
Во услови на затоплување на односите, портпаролот на Стејт департментот, Томи Пигот, потврди дека владата на Ахмед ал-Шара ги исполнува барањата на САД, вклучително и соработката во пронаоѓањето на исчезнатите Американци и отстранувањето на преостанатото хемиско оружје.
„Овие акции се преземаат како признание за напредокот што го постигна сириското раководство по заминувањето на Башар ал-Асад и повеќе од 50 години репресија под режимот на Асад“, рече Пигот. Ахмед ал-Шара и неговиот тим вложуваат големи напори да се претстават како умерени политичари подготвени да воведат нова ера на мир и просперитет за земјата уништена од тринаесетгодишна граѓанска војна и конструктивно да соработуваат со регионалните сили.
Сепак, израелската влада наводно се спротивставува на целосното укинување на санкциите на САД, верувајќи дека Вашингтон со тоа ќе изгуби клучен лост на влијание во преговорите со Дамаск. Иако Израел и Сирија сè уште се формално во војна, а Израел ги окупира сириските Голански висорамнини, Трамп изрази надеж дека двете земји можат да ги нормализираат односите.
Американскиот Стејт департмент ја отстрани од својата црна листа на терористи пред три дена, а се очекува Сирија официјално да се приклучи на коалицијата предводена од САД против Исламска држава (ИД) за време на посетата на Вашингтон.
Сириските безбедносни сили веќе извршија 61 рација низ целата земја овој месец, насочени кон ќелии на ИД. Уапсени се 71 лице и запленета е голема количина експлозиви и оружје, соопшти Министерството за внатрешни работи.
