Сите што гласавме за Преспанскиот договор имаме удел во ова што се случува, велат осумте пратеници од опозицијата што гласаа за уставните измени

Во низата честитки кои стигнаа до адресата на МПЦ-ОА по признавањето на нејзината автокефалност, со честитка се огласи и групата од осумте пратеници од редовите на ВМРО-ДПМНЕ и коалицијата кои во 2018 година гласаа за уставните промени, односно за промена на уставното име на земјава.

Оттаму ја честитаат одлуката за автокефалност на МПЦ-ОА и велат оти сите тие кои гласале „за“ Преспанскиот договор имаат удел во она што се случува денес, додавајќи оти за вакви победи вредела секоја жртва.

„Овој сон конечно станува реалност и денешниот голем празник Св.Кирил и Методиј ќе го паметиме како историскиза православието и македонскиот идентитет. Сите ние со гласот ЗА Преспанскиот договор имаме удел во ова што се случува денес и за вакви победи вредеше секоја жртва – стои во честитката од осумте пратеници.

Да се гледа кон иднината, додаваат оттаму, не е секогаш едноставно, но додаваат оти само храбри одлуки носат промени кои биле долгогодишна желба.

-Само признаена држава, гордо и еднакво исправена до своите меѓународни партнери може да биде успешна приказна. Задоволство е што ставивме уште едно делче во мозаикот на македонските победи. Да ни се множат убави вести и заедно да им се радуваме – додаваат оттаму.

Инаку, во групата од осумте пратеници кои ја испратија честитката до МПЦ-ОА за нејзината автекофалност, а кои преходно гласаа за уставната промена на името на земјава спаѓаат: Владанка Авировиќ, Љубен Арнаудов, Сашо Василевски, Нола Исмајлоска Старова, Крсто Мукоски, Елизабета Канческа Милевска и Емилија Александрова.