Скандал во прилепско училиште: Родител упаднал кај директорката со закани и навреди – „Не сакам детето да ми учи со ѓупчишта“, објави 4NEWS.mk
Комисијата за спречување и заштита од дискриминација (КСЗД) донесе мислење со кое утврди дека родител на прваче во Прилеп извршил тешко вознемирување врз основа на етничка припадност и општествен статус. Инцидентот се случил во основно училиште, каде таткото, револтиран што неговото дете треба да учи во иста средина со деца од ромската заедница, упаднал во канцеларијата на директорката, упатувајќи навреди и закани кои ја шокирале јавноста.
Случајот е пријавен од страна на в.д. директорката на училиштето, која била директна жртва на нападот. Според наодите на Комисијата, родителот одбил да го запише детето во училиштето кое му следувало според реонизацијата, користејќи говор на омраза.
„Во Америка не сакав со црнчишта, овде не сакам со ѓупчишта“
Во претставката до КСЗД, директорката детално го опишала настанот што се случил околу пладне. Родителот влегол во нејзината канцеларија и агресивно реагирал на фактот што неговото дете е распоредено во тоа училиште.
„Јас во Америка не сакав децата да ми учат со црнчишта, не па овде со ѓупчишта,“ биле зборовите што родителот ги упатил , со што, според Комисијата, извршил директно вознемирување врз основа на етничка припадност кон сите ученици Роми во училиштето.
Покрај расистичките навреди, тој упатил и закани по животот на директорката и нејзиното семејство. Поради претрпениот стрес и вознемиреност, директорката побарала медицинска помош во Итната помош и на нервното одделение во прилепската болница.
Одбраната на родителот: „Не сум кажал такво нешто“ Во своето произнесување пред Комисијата, родителот ги негирал обвинувањата.
Тој тврдел дека неговата посета била само за да ја извести директорката дека детето веќе е запишано во друго училиште, врз основа на адресата на мајката. Тој доставил и документи (лични карти и имотен лист) со кои сакал да докаже дека мајката и детето живеат на друга адреса која спаѓа под друго училиште.
Меѓутоа, Комисијата утврдила дека адресите на таткото и мајката во личните карти се различни, а во изводот на детето како адреса на живеење е наведена токму онаа која води кон спорното училиште. Комисијата пресече: Има вознемирување, мора да се извини Комисијата за спречување и заштита од дискриминација заклучи дека родителот немал легитимна и оправдана причина да одбие упис во тоа училиште, освен неговите предрасуди.
Донесени се две клучни препораки: Писмено извинување: Родителот мора во рок од 30 дена писмено да ѝ се извини на директорката за вознемирувањето врз основа на општествен статус, како и на учениците од ромската заедница за етничкото вознемирување. Воздржување од идни испади: Му се препорачува во иднина да не презема слични дејствија на дискриминација. Доколку родителот не постапи по овие препораки, Комисијата најави дека ќе поднесе барање за покренување на прекршочна постапка пред надлежен суд.
Извор: 4news.mk
