Славевски- Политичарите кога одат на избори знаат дека инфлацијата е непопуларна.Нашата е заради шокови однадвор или од внатре

Верувајте, јас сум убеден дека на Владата не ѝ одговара висока инфлација и Владата на највисоко ниво е свесна за тоа, затоа што познато е дека инфлацијата, посебно во последниве пет-шест години, и на глобално ниво е на некој начин ги има сензитивизирано граѓаните – вели гувернерот на Народната банка

Трајко Славески – гувернер на Народна банка / Фото: принтскрин

На Владата не и одговара да има висока инфлација и на највисоко ниво таа е свесна за тоа. Кога одат политичарите на избори, знаат дека меѓу граѓаните растот на инфлацијата е непопуларно. Кај нас ја има заради шокови од надвор или од внатре, вели гувернерот на Народна банка, Трајко Славески во неделното интервју за Радио Слободна Европа.

„Факт е дека инфлацијата во еврозоната или дезинфлацијата оди побрзо до што во Република Македонија. По моја оценка тоа се должи на се уште присутните инфлациски очекувања во државата коишто не успеавме во изминатиот период до крај да ги потиснеме. Кога велам инфлациски очекувања мислам на тоа дека постои верување дека цените и натаму ќе растат и самото тоа ја храни инфлацијата само од себе“,изјави Славески.

Тој анализира како се манифестира инфлацијата во државата и меѓу другото, го темели тоа на промените во релативните цени.

„И производителите очекуваат дека ќе растат цените и се обидуваат да постигнат повисока цена. Граѓаните се приспособуваат, работниците притискаат за повисоки плати и така натаму… Ние имаме заради некои шокови од надвор или од внатре, промени во цените на некои производи и услуги, на пример оваа година кај овошјето и зеленчукот заради познатите причини – лоши временски услови, коишто придонесуваат за зголемување на стапката на инфлација, но од друга страна значат промена во релативните цени. Овошјето и зеленчукот стануваат поскапи во однос на некој друг производ“,вели Славески.

Гувернерот на Народна банка очекува процесот на дезинфлација да продолжи и во наредните година две, државата ќе успее да се приближи до историските нивоа на стапката на инфлација од 2 проценти.

„Верувајте, јас сум убеден дека на Владата не ѝ одговара висока инфлација и Владата на највисоко ниво е свесна за тоа, затоа што познато е дека инфлацијата, посебно во последниве пет-шест години, и на глобално ниво е на некој начин ги има сензитивизирано граѓаните. И сега ако зборуваме за политиката, политичарите оние кои што одат на избори, тоа значи дека не е популарно. Граѓаните се на некој начин алергични, имаат аверзија кон инфлацијата и оние влади и политики коишто ќе испорачаат пониски стапки на инфлација подобро поминуваат“,вели Славески меѓу другото во интервју за РСЕ.