Смртоносно торнадо во Португалија: Уништени кампови, три жртви и најмалку 28 повредени

Португалија е погодена од разорен налет на торнадото „Клаудија“, по кое, според официјалните информации, три лица загинаа, а најмалку 28 се повредени, додека стотици домови и објекти се оштетени или уништени.

Олујата што деновиве ја зафати Португалија, Шпанија, Британија и Ирска предизвика екстремни временски неприлики, поплави, силни ветрови и сериозни материјални штети.

Пронајден удавен брачен пар кај Лисабон

Спасувачките тимови пронашле тела на постар брачен пар во нивната поплавена куќа во Фернао Феру, во близина на Лисабон. Се верува дека нив ги изненадил поплавниот бран додека спиеле и не успеале да излезат поради наглиот налет на водата.

Торнадото го погоди Албуфеира – уништен камп, 85-годишна Британка загина

Во саботата силно торнадо го погоди туристичкиот град Албуфеира на југот на Португалија. Претставникот на цивилната заштита Витор Важ Пинто потврди дека починала 85-годишна Британка, а 28 лица биле повредени во хотел во близина на погодениот камп „HolaCamp“.

Очевидци сведочат дека налетите на ветерот фрлале камења, уриваале покриви и превртувале автомобили. Туристите, меѓу нив и многу Британци, се засолниле во привремени скривалишта додека олујата беснеела низ кампот.

Пронајден уште еден загинат – британски пензионер

Властите соопштија дека едно лице било пријавено за исчезнато, но подоцна било пронајдено под урнатините и идентификувано како британски пензионер.

Португалската метеоролошка агенција потврди дека постои „голема веројатност“ станува збор за вистински торнадо.

Фотографиите од теренот покажуваат целосно уништени куќи, соборени дрвја и значителни штети во поширокиот регион.

Властите издадоа повеќе предупредувања

Португалската цивилна заштита издаде портокалово предупредување за округот Брага и за областите Фаро, Сетубал и Беја и жолто предупредување за Виана до Кастело, Порто, Коимбра, Лисабон и други региони. Жолт аларм е активен и во некои приморски делови и на островот Мадеира.

Поплави и во Велика Британија и Ирска

Силни поплави денес го погодија и британскиот град Монмут, како и делови од југоисточен Велс. Локалните служби спроведуваат евакуации и спасувачки операции.
Во Велс се издадени 11 предупредувања, додека во Англија има повеќе од 180 активни аларми за поплави.

Извор: trn.mk