Собрани околу 30 000 евра на аукција иницирана од „Support Kocani“ за поддршка на настраданите во „Пулс“

На аукцијата која се одржа вчера во кочанскиот културен центар „Бели мугри“ се наддаваше за над 140 дела и ракотворби од уметници од целата земја

Фото: Support Kocani

Околу 30.000 евра се собрани на вчерашната хуманитарна аукција на уметнички дела за помош на настраданите во пожарот во дискотеката „Пулс“ во Кочани, соопшти „Support Kocani“.

Аукцијата се одржа во кочанскиот културен центар „Бели мугри“, а сите средства ќе бидат донирани на семејствата на 62-те жртви и околу 200 повредени во ужасниот пожар на 16 март.

Вчера се наддаваше за над 140 дела и ракотворби од уметници од целата земја, кои уште неколку дена ќе бидат изложени во „Бели мугри“ со цената по која се купени и нивниот нов сопственик.

На аукцијата учествуваа и претседателката Гордана Сиљановска-Давкова, в.д. градоначалникот на Општина Кочани Венко Крстевски, лидерот на СДСМ Венко Филипче, пратениците Павле Арсоски и Миле Лефков, градоначалникот на Општина Центар Горан Герасимовски и локални бизнисмени.

Денеска, во знак на почит кон загинатите во Кочани ќе се одржи велосипедска тура „62 километри“, ќе се вози по стариот пат во правец на Штип и назад, во должина од 62 километри.