Тие реагираат по препораката на Комитетот за светско наследство на УНЕСКО, со која се бара привремена забрана на градежните активности во близина на Блатото и комплексот „Горица 3“, сè до изготвување на стратегиска оцена и процени за влијанието врз природното и културното наследство.

Од „Охрид СОС“ наведуваат дека во извештајот како аргумент се посочува дека урбанистичкото планирање за „Горица 3“ датира од 2007 година, а одобрението за градба е издадено во 2012 година, односно пред донесувањето на Планот за управување со светското природно и културно наследство на Охридскиот Регион (2020–2029). Според нив, Планот за управување предвидува усогласување на претходно донесените урбанистички акти со неговите одредби, а посочуваат и на одлука на Уставниот суд со која се утврдува таква обврска. Тие дополнуваат дека градежните активности за комплексот започнале во 2024 година.

„Со донесувањето на Планот за управување во 2020 година, сите урбанистички планови и документации, без оглед кога се донесени, мора да се применуваат и спроведуваат согласно неговите услови, режими на заштита и ограничувања. Ова е потврдено и со одлука на Уставниот суд на Република Македонија, кој утврдил дека претходно донесените урбанистички акти подлежат на усогласување со Планот за управување. Дополнително, градежните активности за „Горица 3“ започнаа дури во 2024 година — четири години по стапувањето во сила на Планот, кога неговата примена е веќе во тек и обврзувачка“ наведуваат од таму.

Градежните работи, како што велат, не само што не се прекинати, како што е побарано од страна на Комитетот за светско наследство, туку тие продолжуваат со несмалено темпо.

„Не е направена ни бараната стратегиска оцена, како ни процените за влијанијата за сите проекти. Одговорот на оваа препорака е сумиран во една единствена реченица, без воопшто да се спомне она што е реално побарано во дадената препорака 11а. Дали преку вака срочениот одговор намерно се штити приватниот интерес на довчерашниот партиски член?“ прашуваат од СОС Охрид.

Здружението информира дека во изминатите години повеќепати укажувало на потребата од поцелосна примена на препораките на УНЕСКО, како и на спроведување на мерките од Стратегискиот план за рехабилитација. Во реакцијата се наведува дека, според нивните информации, одредени препораки не се целосно реализирани или нивната имплементација се одвива во ограничен обем.

Во соопштението се осврнуваат и на формирањето на Централизиран кризен координативен штаб за спроведување на Стратегискиот план, кој според владините информации започнал со работа во јануари 2026 година. Од „Охрид СОС“ бараат целосна транспарентност во процесот и усогласување на сите урбанистички и градежни активности со Планот за управување.

Од Владата претходно соопштија дека во Париз бил презентиран извештајот за напредокот во спроведувањето на препораките и дека државата останува посветена на заштитата на Охридскиот Регион и на соработката со Република Албанија со цел долгорочна и одржлива заштита на светското наследство.