Совет за безбедност: Безбедносната состојба во земјава е стабилна, осуда за воените дејствија над Украина

Членовите на Советот за безбедност на седницата која утрово ја свика претседателот Стево Пендаровски ги осудија воените дејствија кои Русија ги презема над Украина и кои веќе донесоа загуба на човечки животи и материјална штета.

Тие констатираа дека безбедносната состојба во земјата е стабилна и дека е потребно е надлежните институции да продолжат да ги следат состојбите и да изготвуваат можни сценарија согласно развојот на настаните, со цел навремено дејствување.

„На седницата беше информирано дека земјава има доволно стокови резерви и енергенси. Надлежните институции беа задолжени секојдневно да ги следат состојбите, за да се интервенира доколку има потреба“, наведено е во соопштението од претседателскиот кабинет.

На седницата, тема на дискусија биле и македонските граѓани кои се уште се наоѓаат во Украина.

„Во однос на македонските граѓани кои се наоѓаат во Украина, државата ги презеде неопходните мерки за нивна безбедна евакуација, како и на вработените во нашата амбасада во Киев“, изјавија од кабинетот на Пендаровски, додавајќи дека како НАТО членка, Северна Македонија е во редовна координација со Алијансата и сојузниците во однос на идните активности кои ќе се преземат од страна на сојузниците.

Членовите на Советот беа информирани за активностите кои ги презема Владата, во контекст на пакетот рестриктивни мерки на ЕУ, кон кои се приклучи и Северна Македонија, а кои опфаќаат таргетирани мерки за утврден број лица од политиката и бизнисот кои одиграле улога за настанатата ситуација во Украина. За нив се воведува забрана за патување низ земјите на ЕУ, како и забрана за пристап до финансиските фондови на Унијата.

Советот за безбедност упати апел до сите политички чинители за одговорно однесување и воздржување од потпалувачки говор и ширење на дезинформации кои се спротивни на националните интереси на државата, имајќи предвид дека сме членка на НАТО.

На седницата беа присутни редовните членови на Советот: претседателот на Собранието Талат Џафери, претседателот на Владата Димитар Ковачевски, министерката за одбрана Славјанка Петровска, министерот за внатрешни работи Оливер Спасовски, како и членовите именувани од претседателот: Трајан Гоцевски, Ненад Марковиќ и Ветон Љатифи.

На покана на претседателот, на седницата на Советот присуствуваа и директорот на Агенцијата за разузнавање, заменик-директорот на Агенцијата за национална безбедност и Началникот на Генералштабот на Армијата.

На седницата линковски се вклучија и амбасадорот на Северна Македонија во НАТО и амбасадорот во Киев, кои информираа за најновите случувања во Украина и за преземените активности во рамки на НАТО.

Можеби ќе ве интересира
Close
Back to top button
Close