Спасовски на Свечено собрание на ДПТ: Едно општество за сите и европска држава се сигурност за сите
Носителот на кандидатската листа на коалицијата „Можеме“ во Втората изборна единица Оливер Спасовски синоќа се обрати на Свеченото собрание на Демократската партија на Турците која славеше 30 години од постоењето.
– Демократската партија на Турците е вградена во темелите на нашата земја. Создадена е кога и нашата независна и суверена држава. Многу квалитетни кадри од оваа партија овие три децении макотрпно рамо до рамо заедно работеа да дојдеме до ваква држава денес, којашто е на сите граѓани подеднакво без разлика на националната, верската, етничката припадност, држава којашто е дел од НАТО и е на чекор од почнување преговори со Европската Унија, рече Спасовски.
Додаде дека заедно со ДПТ во изминатите години донесени се храбри одлуки и оти заедно работат на концептот „Едно општество за сите“.
Спасовски се осврна и на принципелната и пријателска соработка со Турција и изрази благодарност за поддршката и помошта што земјава ја доби од Турција за време на корона кризата.
Ги повика сите граѓани Турци во земјава да излезат и да гласаат за, како што рече, заедно да продолжат по патот на сигурноста, новата развојна економија, еднаквоста и евроатлантскиот пат.
