Стојковски: Преговорите започнаа денеска и тука нема никаква дилема

Македонија денеска во Брисел по 17 години чекање ги започна пристапните преговори за членство во Европската унија. Но, не сите сметаат дека преговорите се навистина започнати.

Опозициската ВМРО-ДПМНЕ вели дека денешното случување во Брисел било само една фарса на СДСМ и ДУИ, а преговори нема.

Андреја Стојковски од Институтот „Преспа“ за „Фокус“ објаснува дека преговорите започнуваат со првата меѓувладина конференција.

Преговорите започнуваат со првата меѓувладина конференција! Тоа се случи денес во Брисел и тука нема, ниту пак треба да има, никаква дилема. Има неколку аргументи во корист на оваа теза:
1. Изјавата на ЕУ посочува на историски момент, што би рекло на отворањето на преговорите.
2. Преговарачката рамка посочува на оваа меѓувладина конференција како на почеток на преговорите и упатува на следните чекори.
3. Заклучоците на Советот го користат истиот пример и реферираат на што треба да стори комисијата, вели Стојковски.

Тој додава дека следните чекори се однесуваат на интензивно разменување на мислења и информации низ процесот на објаснувачки скрининг, потоа билатерален скрининг и подготовка на заедничка преговарачка позиција.

Комисијата ќе го стори своето, тука нема дилема, но сега е на нас да продолжиме онаму каде што застанавме. Реформи, гап анализи за да го поддржиме билатералниот скрининг од Комисијата и конечно три патокази и еден акциски план, како и уставни амандмани, вели Стојковски.

Сепак, во случајот на Македонија ЕУ со цел пронаѓање компромисно решение за кревање на ветото од Бугарија, воведе и втора меѓународна конференција, која ќе се случи по внесувањето на Бугарите во македонскиот Устав.

Се очекува скринигот за трае од 13 до 18 месеци и во овој период треба да се направат уставните измени за да не дојде во застој во преговорите и за да може да се премине на отворање на поглавјата.

Без промена на уставот нема продолжување на процесот, но и без тоа има многу работи кои теба да се сторат до тогаш, заклучува Стојковски.

Можеби ќе ве интересира
Close
Back to top button
Close