Судири меѓу демонстрантите и полицијата во Тунис поради високата невработеност
Полицијата во јужниот туниски град Татауин денеска испука солзавец за да ги растера демонстрантите кои го кренаа својот глас против високата невработеност во областа.Тие фрлаа камења кон припадниците на полицијата и ги блокираа патиштата во градот, пренесоа британските медиуми, повикувајќи се на очевидци.
Демонстрантите ја повикаа владата да го спроведе договорот од 2017 година за создавање работни места во нафтените компании и инфраструктурни проекти за намалување на невработеноста, која во оваа област во моментов изнесува околу 30 проценти, што е една од највисоките стапки на невработеност во Тунис, пренесоа британските медиуми.
-Ситуацијата во нашата област е опасна. Од прозорецот на мојата куќа видов како полициските сили истрелуваат солзавец и бркаат млади луѓе, изјави очевидецот Исмаил Смида.
Друг сведок, пак, кажа дека имало судири меѓу полицијата и стотиците демонстранти, кои фрлале камења, блокирале патишта и викале: „Нема да се откажеме, го сакаме нашето право на развој и работни места“.
Во 2017 година се одржаа протести поради недостатокот на работни места во провинциите Татауин и Кебили, што влијаеше врз производството на нафта и природен гас во областа каде што работат француската компанија „Перенко“ и австриската ОМВ.
Тоа доведе до договорот, во кој беа ветени работни места во нафтените и развојни проекти, но демонстрантите тврдат дека договорот не е имплементиран ни по три години од постигнувањето.
