Судири на демонстрантите и полицијата во Портланд, уапсени 11 лица

– Демонстрантите и полицијата синоќа повторно се судрија во Портланд, во американската сојузна држава Орегон.

За време на судирот, што се случи во близина на зградата на градската администрација, полицијата уапси 11 демонстранти.

Демонстрантите и полицијата ги започнаа судирите уште претходниот ден, а во соопштението на градската полиција се наведува дека демонстрантите ги гаѓале полицајците со „проектили“, без да прецизираат за што станува збор.

Полицијата употреби гумени куршуми за да ги растера демонстрантите кои се собираат на протести по повод убиството на Афроамериканецот Џорџ Флојд во Минеаполис, кои во Портланд траат веќе три месеци.