СЗО: Бавното вакцинирање ја продолжува пандемијата во Европа

Експертите на Светската здравствена организација го критикуваат бавното темпо на вакцинацијата во Европа и порачаа дека напливот на инфекции со коронавирус е „загрижувачки“.  Организацијата предупреди дека брзото ширење на вирусот во моментов може да го зголеми ризикот од нови соеви коишто се појавуваат во регионот.

Директорот на СЗО за Европа, Ханс Клуге, вели дека процесот на бавно вакцинирање во Европа „ја продолжува пандемијата“. „Вакцините се нашиот најдобар излез од оваа пандемија … Сепак, примената на овие вакцини е неприфатливо бавна“, изјави Клуге.

Тој порача дека мора да се забрза процесот со засилување на производството, намалување на административните бариери за вакцини и користење на секоја вијала што ја има на залиха. Според Клуге, ситуацијата со вирусот во Европа е „најзагрижувачка во последниве месеци“.

Предупредувања за нови соеви 

Неделниот број на нови случаи во Европа се намали на помалку од еден милион пред нешто повеќе од еден месец. „Минатата недела се зголеми ширењето на Ковид-19 во поголемиот дел од земјите во европскиот регион на СЗО, со 1,6 милиони нови случаи“, соопшти европскиот огранок на СЗО.  Вкупниот број на смртни случаи во Европа брзо се приближува до еден милион, а вкупниот број на случаи ќе надмине 45 милиони.

Големиот број случаи во целиот регион ги зголеми стравувањата дека може да се појави нова, поотпорна варијанта на вакцините против Ковид-19. Европскиот регион на СЗО се состои од 53 земји и територии кои ја вклучуваат Русија и неколку нации од Централна Азија.„Загриженоста за појава на нови варијанти на вирусот се зголемува со брзината со која тој се шири, па затоа е клучно ограничувањето на преносот преку основни активности за контрола на болеста“, рече регионалниот директор за итни случаи на СЗО во Европа, Дорит Нитзан.