СЗО: Многу болести се јавуваат како последица на осаменоста

Секоја шеста личност во светот страда од осаменост, која, заедно со социјалната изолација, може да доведе до развој на бројни физички болести, што на крајот резултира со 871.000 смртни случаи годишно низ целиот свет, според податоците од Светската здравствена организација (СЗО).

Самоста го зголемува ризикот од мозочен удар, срцев удар, дијабетес, депресија, анксиозност и на крајот самоубиство, објави СЗО.

Се покажа дека осамените тинејџери имаат 22 проценти поголема веројатност да постигнат пониски оценки од нивните неосамени врсници, додека осамените возрасни лица се соочуваат со поголеми проблеми кога станува збор за наоѓање или задржување на работа.

„Болно и субјективно чувство“

Влијанието не е само индивидуално, туку и социјално, со оглед на милијардите трошоци наменети за функционирање на здравствените системи, а е поврзано и со губење на работни места.

Копретседателот на комисијата на СЗО, Вивек Мурти, ја дефинира осаменоста како „болно, субјективно чувство што многумина од нас го доживуваат кога врските што ни се потребни не се совпаѓаат со врските што ги имаме. Социјалната изолација, пак, е објективна состојба на помалку контакти, врски или интеракции“.

Извештајот проценува дека во денешниот свет, секое трето постаро лице и секој четврти адолесцент се социјално изолирани.

Причините се разни болести, лошо формално образование, ниски приходи, недостаток на можности за социјална интеракција, живеење во осаменост и употреба на дигитални технологии.

Мурти истакнува дека луѓето се навикнати да комуницираат со милениуми, не само со зборови, туку и со изрази на лицето, говор на телото, тон на гласот или само тишина, а таквите форми на комуникација се губат кога луѓето се потпираат исклучиво на мобилни телефони и социјални мрежи