„Тајмс“: Стармер не се откажува од „центрите за мигранти“ на Балканот и во Македонија, разузнавачи велат дека тоа не е добра идеја

Стармер овој месец потврди дека владата е во разговори со „повеќе земји“ за отворање на центрите, слични на оној кој Италија го отвори во Албанија, наведувајќи дека тоа било „навистина важна иновација“. Според разузнавачки извори кои ги цитира „Тајмс“, британските власти се во разговори со Србија, Косово, Северна Македонија и Босна и Херцеговина за отворање на центри во кои привремено би престојувале луѓето одбиени за визи за влез во Обединетото Кралство, пред да бидат депортирани во матичните земји. Британските разузнавачки претставници велат дека тоа е опасен потег, со оглед на влијанието на Русија во регионот, особено во Србија, пишува лондонскиот весник.

Според владини извори со кои разговарале новинарите на „Тајмс“, безбедносните упатства за разузнавање наведуваат дека регионот е небезбеден за шеми за депортација на мигранти поради неговата близина до Русија и докажаното влијание на Москва во балканските земји. Плановите на Стармер би значеле поставување на чувствителна национална инфраструктура и објекти во „руската сфера на влијание“ каде што агенти кои дејствуваат во име на Кремљ би можеле да се инфилтрираат и да ги таргетираат, велат разузнавачите.

Исто така, се предупредува дека и самите мигранти испратени во регионот би можеле да бидат цел на регрутација од режимот на Владимир Путин.

Според „Тајмс“, Србија, Косово, Северна Македонија и Босна и Херцеговина се на списокот од десетина земји што министрите и функционерите ги разгледуваат како можни дестинации за одбиените баратели на азил, откако тие ќе ги исцрпат сите опции за жалби во Велика Британија. Албанија исто така била на списокот, но нејзиниот премиер Еди Рама ја отфрли таквата можност.

Плановите за екстратериторијални центри за мигранти на Балканот веќе беа блокирани од загриженоста на MI6 (британско разузнавање) кога претходната конзервативна влада состави список на земји за шема за депортација во стилот на Руанда во 2022 година. Според владин претставник кој работеше на предлозите, списокот ги вклучуваше Албанија и Молдавија.

„Советот што го добивме беше дека ќе испраќаме луѓе директно во руската сфера на интерес. Тие наведоа клучна британска национална инфраструктура, објекти и системи што ќе бидат поставени и во кои Русите би можеле да се инфилтрираат со поставување агенти и други лица што работат за Кремљ. Во суштина, би се поставил клучен дел од британскиот интерес, британска почва, токму во област каде што Русија има многу поголема контрола и влијание од кое било друго место во светот. Безбедносната проценка беше дека ова не е ниту разумно ниту изводливо“, вели изворот за „Тајмс“.

Мицкоски категорично негираше дека во Македонија ќе се отвораат центри за мигранти

Последниот текст на „Тајмс“ на оваа тема доаѓа непосредно откако македонската влада склучи договор за стратешко партнерство со Велика Британија, според кој земјава добива пристап до заеми во вредност од пет милијарди фунти за инвестиции во инфраструктурата. Кога во македонските медиуми ова беше поврзано со плановите на Лондон да отвори центри за мигранти во земјава, премиерот Христијан Мицкоски тоа категорично го негираше.

„Таа тема е затворена, и таа тема нема да се пренесе тука. Така што граѓаните може да бидат спокојни“, рече македонскиот премиер пред десетина дена.

Во меѓувреме, косовската претседателка Вјоса Османи изјави дека нејзината земја ќе биде „отворена“ за разговори за потенцијален договор за прием на одбиени баратели на азил од Велика Британија. Сепак, експертите предупредија на правни пречки, со оглед на тоа што неколку европски земји не ја признаваат независноста на Косово и дека не ја потпишале Европската конвенција за човекови права (ЕКЧП). Се смета дека кабинетот на Стармер има за цел да ги објави дестинациите за центрите за враќање до есен, кога Велика Британија ќе биде домаќин на состанок на лидерите од Западен Балкан во Лондон, каде што илегалната миграција ќе биде клучна тема, пишува „Тајмс“.