Трамп добил сандак кавијар од црвен лосос како подарок од Русија

Претседателот на Соединетите Американски Држави, Доналд Трамп, добил сандак кавијар од црвен лосос од Хабаровскиот регион во Русија, соопшти Министерството за индустрија и трговија на овој далечноисточен руски регион.

Според официјалното соопштение, деликатесот му бил подарен на американскиот претседател по иницијатива на Стив Виткоф, главниот американски преговарач и специјален пратеник, кој претходно го пробал кавијарот за време на ручек во московскиот ресторан „Сава“, во пресрет на разговорите со рускиот претседател Владимир Путин.

Како што пренесува агенцијата РИА Новости, Виткоф за време на посетата на фабриката за преработка на риба во селото Чнирах, во Николаевскиот округ, бил особено импресиониран од квалитетот на црвениот кавијар произведен во Хабаровскиот регион. По дегустацијата, тој изјавил дека и претседателот Трамп би требало да го проба овој производ.

„По коментарот на специјалниот пратеник на американскиот претседател, му беше подарен цел сандак кавијар, кој тој потоа му го достави на Доналд Трамп“, соопшти Министерството за индустрија и трговија на Хабаровскиот регион на својот официјален канал на Телеграм.

Во соопштението дополнително се наведува дека кавијарот од оваа фабрика се произведува со рачно солење и пакување, што, според локалните власти, гарантира висок квалитет и автентичен вкус.