Тренчева – Боте: Кога ќе сфатиме дека културата и клупската сцена движат напред – тогаш ќе имаме подобар ноќен живот и сцена

Музичката платформа „Терапија“ на Тренчева Слободанка – Боте овој месец прави 3 години од своето основање. „Терапија“ се креираше во ек на пандемијата од КОВИД – 19, со цел да се поддржи домашната клупска сцена и култура. Но, полека истата прераснува во платформа која дава поддршка на домашните DJ артисти, но истите и меѓународно ги поврзува. 

Во ова интервју разговараме со основачката на „Терапија“ популарната Боте, која со децении е дел од ноќниот живот во Скопје. Таа со години ја промовира домашната клупска сцена, но иницираше доаѓање и на повеќе реномирани и престижни DJ имиња во минатото во Скопје и тоа: Miss Kitten, Gus-Gus, Matthew Johnson, Heidi, Tale of Us, Ben Klock, Moodymann, Ellen Alien, Vaal, Kink, Acid Arab Тијана Т и др. Сите овие артисти имаа свои сетови во „Сектор 909“, „Епицентар“, „Излет“, „Минус еден’ и други клубови.

„Терапија“ денеска ја поврзува електронската музика со културното наследство, на еден многу уникатен начин, кој не е виден на нашите простори.

Исто така, викендов, на 16 декември, во Скопје доаѓа уште една светски позната DJ-ка, Ели Акула. Нејзиното доаѓање, роденденот на „Терапија“, но и претстојната година се одлични причини за разговор со секогаш позитивната Боте.

Изминува 2023 година. Сега сме во процес на сумирање на работите, тоа што е реализирано или што не сме успеале да го направиме. Како помина оваа година за платформата „Терапија“ ?

–И оваа година беше динамична и различна од претходните. Среќна сум што успеавме да го реализираме дел од зацртаното. Ќе излажам ако кажам дека „сѐ остваривме“, тоа го оставам на политичарите (се смее), но настаните во МОБ и во Музејот на град Скопје дадоа една нова вредност на овој град. Во МОБ го организиравме перформансот “LET US ENTERTAIN YOU AND EDUCATE YOU”. Обединивме активисти, уметници и DJ артисти од Македонија, од Балканот и Европа. Се забавувавме, но зборувавме и за правата на поранливите групи, за клупската сцена и како таа го одразува животот кој го живееме…Сето тоа проследено со посебни визуелни ефекти, кои направија навистина магична атмосфера.

Да не беше „Терапија“ и нашата замисла речиси незабележано ќе поминеше 60 годишнината од скопскиот земјотрес. Направивме тридневен, мултимедијален настан во Музејот на град Скопје. Со изложба на нашите уметници: Корубин, Мазневски и Жерновски, музички дел со Тамара Тодевска и Соња Исмаил и Здружението на џез музичари направивме еден навистина посебен настан за главниот град. Секако, истиот го водеше нашата легенда, а мој драг пријател Игор Џамбазов.

Скопје повторно ги обедини градските луѓе. Имаше една меѓугенерациска енергија и атмосфера која малку нѐ врати во минатото и ни покажа дека со работа и креативност сѐ е возможно.

„Терапија“ одбележува три години. Во сабота, на 16 декември организирате настани во клубот „Минус еден“ и во кафулето BKW. Што може да очекуваме?

Во сабота ќе одбележиме 3 години „Терапија“ со една германска DJ-ка, која има настапувано во огромен број на престижни клубови низ Европа и светот. Скопјани ќе можат да ја слушнат Ели Акула, но и домашните артисти како Нино Флудер и Ивана Драгшиќ. Овие нивни сетови ќе се организираат во клубот „Минус еден“, кој ќе биде посебно уреден и адаптиран. Малку порано истиот ден, ќе започнеме во BKW. Таму ќе имаме музичка и визуелна „терапија“ со нашиот илустратор и радио водител Индог. Во BKW тој ќе презентира и дел од својата изложба „Во цут“ , во чиј фокус е менталното здравје на човекот и заштитата на животната средина. Значи, како што функционираме овие години, така и ќе го одбележиме нашиот роденден. Ќе биде различно, мултимедијално и уникатно. Заврши времето на еднолични и монотони настани. Барем за нас, од „Терапија“.

Честопати велите дека „клубовите ја отсликуваат реалноста која ја живееме“. Каква ни беше реалноста оваа година? Тргнавме ли малку напред во поглед на ноќниот живот?

Оффф, колку длабоко прашање… од каде да почнам. Колку и оваа област да се разликува од другите сепак и клупската сцена, музиката, културата генерално се справуваат со слични проблеми како и другите индустрии.

Сепак, сите го делиме истиот воздух, сите нѐ тангираат горе-доле исти или слични прашања. 

Дали тргнавме напред? Во поглед на ноќниот живот – НЕ. Не направивме некој посериозен исчекор. Затоа што и за квалитетен ноќен живот потребна е активност на повеќе формални и неформални групи, институции, организации, граѓанство. 

„Терапија“ прави напори, дава иницијативи, но ние сме дел од мозаикот.

Сепак, имаше и позитивни примери годинава. Сакам да го спомнам целодневниот настан за 150 години – HEINEKEN, кој даде добра основа за да се надградиме. Се обединија повеќе DJ артисти, се поддржа домашната сцена, имаше програма за деца, млади, родители, повозрасни…  Тоа е патот по кој треба да се движиме. Да создаваме програма за сите, ослободена од стереотипи и предрасуди.

„Терапија“ тоа го увиде во пандемијата. Сите кои сакаат да ни се придружат се добредојдени.

Што подготвува „Терапија“ за следната година? Дали ќе опстоите настаните да ги поврзувате со нашето културно наследство и на тие маркантни локации да правите настани или ќе се одлучите за класични журки?

Апсолутно дека опстануваме на тоа на спомен обележјата кои се дел од македонското културно наследство да им дадеме нова вредност. Доста пропаѓаа и делуваа запуштено. Време е да им дадеме повеќе боја, музика и енергија. Барем на неколку часа.

Затоа, подготвуваме проект за перформанс на Спомен – костурницата во Велес, но за тоа би можеле да споделиме повеќе податоци дури во 2024 година. Работиме и на проектот „Скопје 2028 – европска престолнина на културата“, но има и други проекти кои се во фаза на креирање и преговарање.

Секако дека ќе има журки, ќе има забави, но истите ќе бидат поквалитетни, повпечатливи и поенергични. Ако енергијата кај луѓето, во главниот град е исчезната – тоа не значи дека треба да се откажеме. Напротив, треба уште повеќе да вложуваме во развој на клупската сцена, во ноќниот живот, во културата.

Мене ми е многу жал кога во секоја криза се крати од културата и креативниот сектор. Кога ќе сфатиме дека културата и музиката движат напред и генерираат раст и развој, тогаш ќе нѐ биде. Се до тогаш, ќе има индивидуални успеси, добри настани и иницијативи. Но, за крупна промена треба волја на сите чинители.

Се гледаме во сабота во BKW и „Минус еден“.