ТВ 24 : Германска претходница на терен, неофицијално се испитуваат повеќе опции меѓу кои и спој на продолжен кабел
Пожарот во модуларната болница во Тетово е катастрофален инцидент и го изразуваме нашето најдлабоко сочувство до семејствата и до најблиските на жртвите и до преживеаните. Владата на Северна Македонија ги истражува причините за оваа трагедија и ние тоа внимателно го следиме, велат од Канцеларијата на Светска банка во Република Северна Македонија.
Министерот Венко Филипче вчера излезе со изјава дека „Поставувањето на сите модуларни ковид-центри се по строгите критериуми и претходна согласност од Светска банка“.
Од друга страна меѓународниот противпожарен инспектор, Бобан Трпкоски кој вечерта бил во Тетово на повик на командантот за ТВ24 рече дека причината за брзото разгорување на пожарот, покрај лесно запалливиот материјал е и недостигот на соодветна противпожарна опрема.
Објаснува дека објектот во кој изгореа 14 лица во Тетово немал ниту една таканаречена „противпожарна бариера“ која треба да го запре брзото напредување на пожарот.
Обвинителството пак ги чека извештаите од форензичарите и експертите за електричната мрежа. Една од опциите која се истражува е можен спој од продолжен кабел. За истрагата Обвинителство ја одзеде и документацијата од фирмите „Брако“ и „Ари и Том“ што ја градеа модуларната болница во Тетово ќе се истражува и дали болницата располагала со систем за противпожарна заштита.
Сослушани се и здравствените работници кои биле присутни ноќта кога избувнал пожарот, како и дел од сведоците на местото на настанот. Започнато е и вештачење на снимките од камерите за видео надзор на болницата.
