Украинските власти ја продолжуваат истрагата во врска со скандалот со злоупотреба на воени набавки

Украинските власти продолжуваат и денеска со истрагата во која веќе под сомнение за кривично дело се пет лица за вмешаност во скандал околу злоупотреба на воени набавки, јавија украинските медиуми.

Случајот предизвика гнев во јавноста и го принуди Министерството за одбрана да направи брзи реформи за време на војната.

Властите се сомневаат дека пет лица, вклучително и поранешен шеф на Министерството за одбрана, ги преувеличувале цените додека нарачувале храна за војниците и проневериле повеќе од 17,8 милиони долари во периодот од август до декември 2022 година.

-Криминалното дело е овозможено од службеник на Министерството за одбрана на Украина, кој при потпишувањето на договорот „не ги забележал ценовните аномалии во каталогот“, се вели во соопштението на Националното биро за борба против корупцијата на Украина (НАБУ).

За петтемина е издадено „известување за сомнеж“, што може да доведе до формално обвинение за проневера, сомневање за проневера и перење пари.

Некои производи како цвекло, зелка и компири ги обезбедиле двајца добавувачи по цени околу трипати повисоки од пазарната, велат од Бирото за борба против корупцијата.

Според британски медиуми, дел од проневерените средства најверојатно биле искористени за купување недвижен имот во странство, вклучително и хотели во Хрватска.

Наводниот заговор првпат го привлече вниманието на јавноста во јануари 2023 година, помалку од една година по војната со Русија, откако истрагата на украинските медиуми откри дека Министерството за одбрана преплаќало за основни производи, особено за јајца.