Јули во Кинотека: Филмска жетва во златниот месец – од музички документарци, оскаровци до стари добри класици
– Во златниот месец – јули („златец“ – според архаичниот народен и старословенски говор) Кинотеката нуди примамлива филмска понуда која може да се одгледа во летното кино со интересни блоковски содржини од музички документарци, оскаровци до стари добри класици.
На 1 јули (четврток) програмата започнува со документарниот музички филм ВЛАТКО СТЕФАНОВСКИ ВО ЖИВО ВО „ЛИСИНСКИ“ во продукција на загрепската „Кроација рекордс“ (некогашната култна дискографска куќа „Југотон“), и секој четврток до крајот на месецот под насловот МУЗИЧКИ ЧЕТВРТОЦИ НА „КРОАЦИЈА РЕКОРДС“ ВО КИНОТЕКА посетителите ќе имаат можност да видат музички документарци од оваа куќа. Тука се концертите на Јосипа Лисац, Раде Шербеџија, Амира Медуњанин и Џеј Ар Аугуст (J.R. August, псевдоним на хрватскиот мултижанровски музичар Никола Враниќ).
-Ќе ве потсетиме на годинешниот оскаровец УШТЕ ЕДНА ТУРА (Druk / Another Round) на Томас Винтерберг и еден од најдобрите европски филмови сезонава, ШАРЛАТАН (Charlatan) на Агњешка Холанд, како и на два наслови од минатомесечната НЕДЕЛА НА ЈАПОНСКИ ФИЛМ, РУЧЕКОТ НА ТАТО и СЕКОЈ ДЕН Е ДОБАР ДЕН. Шведскиот филм КОЛКУ БОРОВИНКИ ИМА ВО СВЕТОТ? (Hur många lingon finns det i världen) на Лена Копел го открива хоризонтот на кој се лицата со попреченост, а кои се повеќе или помалку заборавени во рутинското темпо на нашите животи, посочуваат од Кинотеката.
Од 9 до 14 јули летното кино ќе биде домаќин на програмата на КАФЕ КИНО на СКОПСКО ЛЕТО, а потоа следува насловот СИТЕ ПРОТИВ СИТЕ (Vsi proti vsem / All Against All) на словенечкиот режисер Андреј Кошак, филм со македонско малцинско продукциско учество. Рускиот наслов СУПЕРДЛАБОКО (Кольская сверхглубокая / The Superdeep) е спектакл креиран од припадникот на новата генерација филмаџии, режисерот и сценарист Арсениј Сјухин (Arseny Syuhin).
Како опозит на новата визуелна сензибилност, посочуваат од Кинотеката, ќе понудат и неколку стари добри класици.
Блокот започнува со СМРТ ВО ВЕНЕЦИЈА (Morte a Venezia / Death in Venice, 1971) на Лукино Висконти, работен според новелата на еден од најзначајните германски книжевници на 20. век – Томас Ман, продолжува со ГОЗБАТА НА БАБЕТ (Babettes gæstebud / Babette’s Feast, 1987) на режисерот Габриел Аксел (исто според книжевна предлошка, оваа е на исклучителната Карен Бликсен, можеби попозната по романот и филмот МОЈА АФРИКА/Out of Africa), потоа следува НАВИГАТОРОТ (The Navigator, 1924) на холивудската легенда од ерата на немиот филм, „човекот со камено лице“ Бастер Китон. Мини-циклусот на класиците го заокружуваме со ВЕШТЕРКАТА (Häxan / Witchcraft Through The Ages, 1922) на шведско-данскиот автор Бенјамин Кристенсен, кој е еден од втемелувачите на хорор-жанрот во филмот од почетокот на минатиот век, најавуваат од Кинотеката.
Проекцијата на филмовите е во терминот од 20:30 часот.
