УТРИНСКИ БРИФИНГ | Фрчковски: Се заморивме да нѐ учат, сега ние може да бидеме едукатори за мултикултурализам

Деновиве проф. д-р Љубомир Фрчковски е многу актуелен со предлогот да стане амбасадор на РС Македонија во ОН, на што денес на Фејсбук регираше Антонио Милошоски како претседател на Комисија за надворешна политика во Собранието.

-Не знам дали јас да го коментирам ова оти процедурата сѐ уште не е завршена. Впрочем, именувањето на амбасадорите е поврзано со надлежностите на претседателот, а не е поврзано со Собраието. Ова што го прави Милошоски е обид за некаков пазар и притисок кон власта, вели Фрчковски за Утрински брифинг.

Тој појаснува дека улогата на Собранието преку Комисијата за надворешни работи е факултативна. а не суштинска преку сослушувањето на идните амбасадори што го прави оваа комисија.

-Мислам дека претседателот треба да си ги преземе уставните и законските надлежности поврзани со неговата улога во надворешната политика на земјата, а со тоа и околу амбасадорите, вели Фрчковски.

Конференцијата што неделава ја организираше МАНУ по повод 30 години од независноста на Македонија, Фрчковски ја коментира како задоцнета и несоодветна.

– Она што е важно кај овие прослави е меморијата и затоа треба да се организираат добри платформи и дебати. Таа меморија значи државна архива. Овде не беше концептот од таков тип. Ова беше една карактеристична македонска политичка паника дека сѐ што не било во ред некогаш сега некој треба веднаш да ги реши. Тоа е алиби за нивната лоша политика, ги коментира Фрчкоски настапите на поранешните претседатели Црвенковски и Иванов.

Тој смета дека проблем на поранешните претседатели е што сега за две години се решаваат некои клучни работи.

-Сеедно е кој го прави тоа. Преспа, влезот во НАТО, ние сме пред договор со Бугарија и решавање на целиот круг од соседите и почеток на преговорите со ЕУ. Работата оди во добра насока. А тие изнесуваат некои катастрофични сценарија, вели Фрчковски.

Со Заев не е само игра на суети, туку проблемот е што Заев ги решава проблемите и тоа ги решава на добар начин. Преспа е добар договор. Дијалогот со Бугарија ми е многу интересно како се води и како некои се палат. Прво имаше шокови, па се појавија националистите – прво проблем беше јазикот, кој не го губиме но никој не се извини за паниката што се крена, а сега се јави прашањето со бугарскиот фашизам. Не може да се одречат фашистите дека не постоеле оти тоа се кривични дела. Но во една ваква машина ќе се исперат енергиите и ќе добиеме решение кое е во ред, коментира Фрчковски за Утрински брифинг.

Поранешниот претседател на Собранието, Стојан Андов, неодамна повтори дека најважен фактор за постоењето на Македонија се Американците. Фрчковски оценува дека тоа е точна проценка.

-Во 1992 бевме сами. Тогаш 200 американски војници дојдоа во Тетово, за првпат под туѓа команда, за да помогнат да се спротивставиме на политиката на Милошевиќ. Во 1993 Милошевиќ и формално има понуда до Мицотакис за поделба на Македонија. Потоа почна да се гради политичката и дипломатската линија. Тој раскин со Србија беше одлука на Глигоров и тој ја плати цената за таа одука, вели Фрчкоски.

Ако се помине како што предвидуваат процедурите што е нашата работа во ОН како центар на светската политичка моќ низ призмата на мултилатерализам.

-Македонија како мала држава има предност во мултилатералните средишта, во Брисел, во НАТО, и тука е многу важно претставувањето. Нашето претставување е дека Македонија е добра приказна. Лани два успеха беа издвоени од Генералниот секретар на ОН Антонио Гутереш: мирот во Етиопија и Преспанскиот договор. Македонија треба да почне да го наплатува тоа . Во соработка со соседите сме регионален пример и тоа треба да го истакнеме. Ние сме заморени да нѐ учат, но сега може да учествуваме како едукатори како се решаваат проблемите во мултиетнички средини. Тука може да играме многу значајно, коментира Фрчковски за Утрински брифинг.

Целиот разговор погледнете го во видеото