ВИДЕО | Анализа: Дали Груевски иднината си ја гледа во Русија? До каде продре руската пропаганда

Викенд кулумната на новинарот и аналитичарот Љупчо Поповски дава продлабочена анализа за тоа како ситуацијата во Украина се одразува на десницата во Европа, но се осврнува и на судските случаи на некогашното СЈО за време на кои минатата недела имаше признанија на вина.

-Мислам дека адвокатите претпоставувале дека овие процеси нема да одат долго и дека како јагула ќе се измолкнат од оваа ситуација, па дури и можеби ќе дојдат на власт. Миле Јанакиески вели дека четири години нема живот и се влече од суд во притвор, но тој самиот си го избрал своето постапување. Нивните средства се исцрпени иако многу средства и беа извлечени од буџетот. Мислам дека голема улога имаше повикот на нивниот шеф Никола Груевски да се држат цврсто додека тој е во Будимпешта, а неговата најблиска соработничка е веќе две години во затвор и има нова пресуда, вели Поповски за Утрински брифинг.

Поповски вели дека не треба да го заборавиме моментот дека Груевски не се јави во јавност од моментот кога неговите соработници признаа вина. Дури не се ни јави за случувањата во Украина, од што може да се помисли дека тој својата иднина можеби ја гледа во Русија.

-Во оваа десничарска сцена имаме неколку главни актери Ле Пен од Франција, па Салвини од Италија кој беше најголем поклоник на Путин а сега се обидува да промовира прием на бегалци и осуда на инвазијата. Десничарите се дури и построги кон Путин затоа што наскоро имаат избори на кои е прашање со каков наратив ќе излезат. Се борат против бегалци, а треба да примат бегалци од Украина. Како ќе го објаснат тоа? Ги примаат оти се христијани? Тука е и Меланшон како крајно лев популист. И тој беше поклоник на Путин, вели Поповски.

Дезинформативната активност во Македонија долго време е тема на интерес на Петрит Сарачини. Во последниве денови има силен мизогин напад против министерката за одбрана.

-Неколку месеци има зголемени дезинформации во врска со Украина и Русија, особено на социјалните мрежи од т.н. инфлуенсери и од некои портали кои одамна така функционираат. Тоа беше подготовка на теренот во насока на подршка на Путин, вели Сарачини.

Сарачини додава дека на традиционалните и професионалните медиуми руската пропаганда не поминува, но на одредени портали таа пропаганда станува пожестока користејќи ги „аргументите“ на Путин. На социјалните мрежи голем дел се ботови со лажни имиња, но има и реални ликови кои се блиски на ВМРО-ДПМНЕ кои отстапуваат од јавната политика на партијата.

-Влијае на перцепцијата на еден обичен читател кога ќе види под некој напис 20 или 30 проруски коментари сеедно што станува збор за коментари од ботови. Русија сега работи на разоткривање лажни вести од западот користејќи лажни вести, вели Сарачини.

Во врска со албанските читатели и медиуми, Сарачини вели дека има обид за упад на руска пропаганда и дека најмногу се користи верски наратив – еве, се тепаат христијаните меѓу себе, нека се дотепаат, вели Сарачини за Утрински брифинг.