(Видео) Андоновиќ: Нови 9 жртви – Бранот убиства во САД не покажува знаци за намалување
27.05.2021 13:26
289 2 минути читање
Едногодишниот бран убиства со оружје ширум САД не покажува знаци на намалување. Најновите убиства се случија рано утринава во калифорнискиот град Сан Хозе каде осум лица загинаа во пукотницата на железничка станица, по што осомничениот за пукањето откако застрела осум лица и самиот си го одзеде животот. Полицијата соопшти дека осомничениот бил вработен во компанија која обезбедува автобуси, железници и дава други транзитни услуги низ округот Санта Клара, што е најголемиот округ во заливот. Сè уште не се познати причините за овој најнов напад, иако се случува на само три дена откако на друга локација во САД, во Вест Џеферсон во сојузната држава Охајо беа убиени 5 лица во една семејна куќа. Пред само една недела имаше крвава престрелка во Провиденс, Род Ајленд кога најмалку девет лица беа ранети. Статистиката вели дека од март годинава, до сега се случиле вкупно 12 напади со над 20 загинати лица, од кои сите се цивили и минувачи кои случајно се нашле на местото на настанот. Заедничко со сите напади се и немањето на мотиви на напаѓачите за пукање врз недолжни цивили и минувачи.
Во речиси сите инциденти се работи за лица кои од чиста мира пукаат или врз своите колеги или пак врз недолжни минувачи и потоа си го одземаат животот. Полицијата засега отфрла секаков сомнеж за терористички напади или пак поврзаност со овие настани. Едногодишниот бран убиства со оружје ширум САД извршени главно со огнено оружје, се над 30 проценти повеќе минатата година во однос на 2019 година, а во моментов се проценуваат 20-25 проценти повеќе од лани. Експертите велат дека нема едно објаснување за таа појава што ги зафаќа скоро сите поголеми градови и дека не може да се очекува дека нагло ќе падне. Ланскиот број од 20.000 убиства да биде надминат оваа година, највисока цифра од 1995 година.
Според американските медиуми само лани во САД биле продадени околу 23 милиони парчиња пиштоли. Токму либералниот пристап за купување и поседување на оружје е посочен како главна причина за секојдневните престрелки и убиства меќу граѓаните во САД. И самиот претседател Џо Бајден најави дека ќе започне процедура за воведување построги закони за тоа кој може, а кој не да поседува оружје. И додека федералната власт сака да ја сузбие продажбата на оружје, властите во сојузната држава Тексас одобрија предлог-закон со кој на луѓето од 21 година и повеќе им се дозволува да носат пиштоли без дозвола, или придружна проверка и обука. Откако ќе биде потпишан законот, Тексас ќе биде 19-та држава во САД што дозволува носење оружје без дозвола. Сегашниот државен закон им дозволува на жителите од 21 година или повеќе да носат пиштол само по завршувањето на потребната обука и проверка на кривична позадина за да добијат дозвола за носење. Тексас веќе има некои од најслабите ограничувања за оружје во САД. Ова ќе се дозволи се додека сопственикот „не е кривично гонет или има некоја друга законска забрана“, иако не е јасно како ова ќе се утврди без проверки. Групите за контрола на оружје се спротивставија на мерката, посочувајќи ја историјата на масовните пукања во Тексас, но и растечкиот тренд на насилствата во САД изминатите месеци кој не покажува знаци на намалување.
